നീലേശ്വരം: രാജാറോഡില്‍ കെ.എസ്.ആര്‍.ടി.സി ബസ് തകരാറിലായി. ഇതേതുടര്‍ന്നു മണിക്കൂറുകളോളം നഗരത്തില്‍ ഗതാഗതം താറുമാറായി. ചിറ്റാരിക്കാലിലേക്കു പോകുകയായിരുന്ന ബസാണ് പോസ്റ്റ് ഓഫിസിനു മുന്നില്‍ മേല്‍പാലത്തില്‍ തകരാറിലായത്. രാവിലെ ഏഴോടെയാണു സംഭവം. ഇതേ തുടര്‍ന്ന് നഗരത്തില്‍ നീണ്ട ഗതാഗതക്കുരുക്കാണ് അനുഭവപ്പെട്ടത്. വിഷുദിനത്തലേന്ന് സാധനങ്ങള്‍ വാങ്ങാന്‍ നഗരത്തിലിറങ്ങിയവരും ഏറെ വലഞ്ഞു.
പൊതുവേ ഗതാഗതക്കുരുക്കനുഭവപ്പെടുന്ന രാജാറോഡില്‍ ഇതുകൂടി ആയതോടെ യാത്രക്കാര്‍ ഏറെ ബുദ്ധിമുട്ടി. പൊലിസും നീലേശ്വരം വി.എസ് ഓട്ടോ സ്റ്റാന്‍ഡിലെ ഡ്രൈവര്‍മാരും നഗരത്തിലെ ചുമട്ടുതൊഴിലാളികളും ഗതാഗതം നിയന്ത്രിച്ചു.
കെ.എസ്.ആര്‍.ടി.സിയുടെ മെക്കാനിക്ക് എത്താന്‍ വൈകിയത് ഗതാഗത തടസം വര്‍ധിപ്പിച്ചു. ഇതേത്തുടര്‍ന്ന് ഇവര്‍ ബസിനെ തള്ളി ബസ് സ്റ്റാന്‍ഡില്‍ എത്തിച്ചാണ് ഗതാഗത തടസം ഒഴിവാക്കിയത്. അപ്പോഴേക്കും പതിനൊന്നു മണിയോടടുത്തിരുന്നു. ഉത്സവ ദിനങ്ങളായതു കൊണ്ടുതന്നെ കഴിഞ്ഞ കുറച്ചു ദിവസങ്ങളായി സാമാന്യം നല്ല തിരക്കാണ് റോഡില്‍ അനുഭവപ്പെടുന്നത്.