മങ്കട: മണ്ഡലത്തിലെ വോട്ടിങ് ശതമാനത്തിലെ കുറവ് വിശകലനം ചെയ്ത് ഇരുമുന്നണികളും. വോട്ടിങ് ശതമാനത്തിലെ കുറവ്  ഇരു മുന്നണികളെയും ആശങ്കപ്പെടുത്തുന്നെങ്കിലും യു.ഡി.എഫിനു മികച്ച ഫലമുണ്ടാകുമെന്നാണ് പൊതു വിലയിരുത്തല്‍. 68.58 ശതമാനമാണ് മണ്ഡലത്തിലെ പോളിങ് ശതമാനം. നിയമസഭാ തെരഞ്ഞെടുപ്പിനെ അപേക്ഷിച്ച് എട്ടര ശതമാനത്തിലേറെ കുറവ്. 77.32 ശതമാനമായിരുന്നു കഴിഞ്ഞ നിയമസഭാ തെരഞ്ഞെടുപ്പിലെ പോളിങ് ശതമാനം.
അതേസമയം 69.4 ശതമാനമാണ് കഴിഞ്ഞ ലോക്‌സഭാ തെരഞ്ഞെടുപ്പില്‍ പോള്‍ ചെയ്തത്. കഴിഞ്ഞ തദ്ദേശ തെരഞ്ഞെടുപ്പില്‍ അഞ്ചു പഞ്ചായത്തുകള്‍ എല്‍.ഡി.എഫ് സ്വന്തമാക്കി. തുടര്‍ന്നുവന്ന നിയമസഭാ തെരഞ്ഞെടുപ്പില്‍ യു.ഡി.എഫിന്റെ  ഭൂരിപക്ഷം 20000 ത്തിന് താഴെയെത്തി. അതേസമയം ഉപ തെരഞ്ഞെടുപ്പ് ഫലം വ്യക്തമായ മേല്‍ക്കൈ  നേടുമെന്ന്  ഇടതു കേന്ദ്രങ്ങള്‍ കരുതുന്നില്ല. എങ്കിലും മുന്‍ തെരഞ്ഞെടുപ്പുകളിലെ മുന്നേറ്റം യു.ഡി.എഫിനു ഇത്തവണ നേടാനാവില്ലെന്നാണ്  ഇടതു നേതൃത്വത്തിന്റെ കണക്കുകൂട്ടല്‍.
പരമാവധി വോട്ടുകള്‍ പോള്‍ ചെയ്യിച്ച യു.ഡി.എഫ് ഇടതു കേന്ദ്രങ്ങളിലെ പൊതുവായ നിസംഗത, ഇടതു അനുകൂല ചെറു കക്ഷികളില്‍ വെല്‍ഫയര്‍ പാര്‍ട്ടി തുടങ്ങിയ വിഭാഗങ്ങളുടെ വിട്ടു നില്‍ക്കല്‍ എന്നിവ യുഡി.എഫ് അനുകൂല ഫലം ഉളവാക്കുമെന്നാണ് കണക്കാക്കുന്നത്. ബി.ജെ.പി നില മെച്ചപ്പെടുത്താനുള്ള സാധ്യതയും ഇരു മുന്നണികളുടെയും വോട്ടുകളില്‍  പ്രതിഫലിക്കുമെന്നാണ് കരുതുന്നത്.