ഉരുവച്ചാല്‍: ഹൈദരബാദില്‍ നടന്ന ഫെഡറേഷന്‍കപ്പ് ദേശീയ ജൂനിയര്‍ അത്‌ലറ്റിക്‌സ് ചാംപ്യന്‍ഷിപ്പില്‍ വെങ്കലം നേടിയ അനശ്വരയുടെ നേട്ടം മാലൂരിന് അഭിമാനമായി. വനിതകളുടെ പോള്‍വാള്‍ട്ടിലാണ് അനശ്വര നേട്ടം കൊയ്തത്. തൃശൂര്‍ വിമല കോളജില്‍ ഒന്നാംവര്‍ഷ ബിരുദ വിദ്യാര്‍ഥിനിയായ ഈ മിടുക്കി മാലൂര്‍ കുണ്ടേരിപൊയിലിലെ കൃഷി ഓഫീസര്‍ കൂട്ട ശശിപ്രകാശിന്റെയും സനിലയുടെയും മകളാണ്. 2008 ല്‍ മാലൂര്‍ പനമ്പറ്റ ന്യൂ യു.പി സ്‌കൂള്‍ വിദ്യാര്‍ഥിനിയായിരിക്കുമ്പോള്‍ ജില്ലാതലത്തില്‍ 4.18 മീറ്റര്‍ ചാടി ലോംഗ്ജംപില്‍ റെക്കോര്‍ഡ് നേടിയിരുന്നു. 2011 ല്‍ ഹിമാചല്‍പ്രദേശില്‍ നടന്ന വനിതാ സബ്ജൂനിയര്‍ ദേശീയ ബാസ്‌കറ്റ് ബോള്‍ മത്സരത്തില്‍ കേരളടീമംഗമായി പങ്കെടുത്തു.
കൂടാതെ പൈക്ക ദേശീയ മീറ്റിലും പങ്കെടുത്തിട്ടുണ്ട്. പാലാ ജമ്പ്‌സ് അക്കാദമിയിലെ കെ.പി സതീശ്കുമാറാണ് അനശ്വരയുടെ പരിശീലകന്‍. കുണ്ടേരിപൊയില്‍ എല്‍.പി സ്‌കൂള്‍, കണ്ണൂര്‍ സ്‌പോര്‍ട്‌സ് സ്‌കൂള്‍, പാലക്കാട് കല്ലടി ഹയര്‍സെക്കന്‍ഡറി സ്‌കൂള്‍ എന്നിവിടങ്ങളിലും പഠിച്ചിട്ടുണ്ട്. ബാംഗ്ലൂരില്‍ എം.ബി.എ വിദ്യാര്‍ഥിയായ അശ്വിനാണ് സഹോദരന്‍.