തൊട്ടില്‍പ്പാലം: കുറ്റ്യാടിയില്‍ അടച്ചുപൂട്ടിയ വിദേശ മദ്യശാല തൊട്ടില്‍പ്പാലത്തു സ്ഥാപിക്കുന്നതിനെതിരേ സര്‍വകക്ഷി ആക്ഷന്‍ കമ്മിറ്റിയുടെ ആഭിമുഖ്യത്തില്‍ നടത്തിവരുന്ന രാപ്പകല്‍ സമരം ഇന്നു 20-ാം ദിവസത്തിലേക്ക്. നാടിന്റെ സമാധാനന്തരീക്ഷം ഇല്ലാതാക്കുന്ന മദ്യശാലക്കെതിരേയുള്ള പ്രതിഷേധ സമരത്തിന് ഓരോ ദിവസവും വലിയ ജനപിന്തുണയാണ് ലഭിക്കുന്നത്. കഴിഞ്ഞ ദിവസം വിദ്യാര്‍ഥികളും സമരത്തിന് ഐക്യദാര്‍ഢ്യമര്‍പ്പിച്ച് സമര പന്തലിലെത്തിയിരുന്നു. ഇതിനിടെ രാപ്പകല്‍ സമരം ശക്തമാക്കാനും മദ്യശാല പഞ്ചായത്തില്‍ എവിടെ സ്ഥാപിച്ചാലും അവിടേക്കുസമരം വ്യാപിപ്പിക്കാനും കഴിഞ്ഞദിവസം ചേര്‍ന്ന സര്‍വകക്ഷി യോഗം തീരുമാനിച്ചു. ചെയര്‍മാന്‍ എ.ആര്‍ വിജയന്‍ അധ്യക്ഷനായി. കണ്‍വീനര്‍ വി.പി സുരേഷ്, സൂപ്പി മണക്കര, ബോബി മൂക്കന്‍തോട്ടം, റോബിന്‍ ജോസഫ്, കെ.പി ഷംസീര്‍ മാസ്റ്റര്‍, ശ്രീധരന്‍ വാളക്കയം, ചീരമറ്റം തങ്കച്ചന്‍, റോണി മാത്യു സംസാരിച്ചു.