ബാഴ്‌സലോണ: ലാലിഗയില്‍ കിരീടത്തിലേക്ക് കൂടുതല്‍ അടുത്ത് ബാഴ്‌സലോണ. ഇന്നലെ നടന്ന മത്സരത്തില്‍ റയല്‍ ബെറ്റിസിനെ 4-1 തകര്‍ത്ത് രണ്ടാം സ്ഥാനക്കാരുമായുള്ള പോയിന്റ് വ്യത്യാസം പത്താക്കി ഉയര്‍ത്തി. മെസ്സിയുടെ ഹാട്രിക്കിന്റെ കരുത്തിലായിരുന്നു ബാഴ്‌സലോണയുട വിജയം. എണ്ണം പറഞ്ഞ മൂന്ന് സൂപ്പര്‍ ഗോളുകളായിരുന്നു മെസ്സി നേടിയത്. നാലാമത്തെ ഗോളിലേക്കുള്ള വഴി തുറന്നതും മെസ്സിയായിരുന്നു. രണ്ടാം പകുതിക്ക് ശേഷം ലോറെന്‍ മോറേന്‍ ആണ് റയല്‍ ബെറ്റിസിന്റെ ആശ്വാസ ഗോള്‍ നേടിയത്. കഴിഞ്ഞ സീസണില്‍ ഇതേ ടീമിനോട് കാംപ് നൗവില്‍ ബാഴ്‌സലോണ തോല്‍വി അറിഞ്ഞിരുന്നു. ഇതിനുള്ള പ്രതികാരം കൂടിയായി ഇന്നലത്തെ വിജയം. റയല്‍ ബെറ്റിസിന്റെ ഹോം ഗ്രൗണ്ടിലായിരുന്നു മത്സരം നടന്നത്.

പതിനെട്ടാം മിനുട്ടില്‍ ഒരു കിക്കിലൂടെയാണ് ലയണല്‍ മെസ്സി ആദ്യ ഗോള്‍ നേടിയത്.
ആദ്യ പകുതി അവസാനിക്കാന്‍ മിനുട്ടുകള്‍ മാത്രം ശേഷിക്കെ മെസ്സി രണ്ട@ാം ഗോളും കണ്ടെത്തി. ലൂയിസ് സുവാരസ് ആയിരുന്നു മെസ്സിയുടെ ഗോളിന് വഴിയൊരുക്കിയത്. ര@ണ്ടാം പകുതിയില്‍ ആക്രമിച്ച് കളിച്ച് തുടങ്ങിയ ബാഴ്‌സ സുവാരസിലൂടെ മൂന്നാം തവണയും ഗോള്‍ കണ്ടെത്തി.
ബെറ്റിസിന്റെ പ്രതിരോധ താരങ്ങളെ കാഴ്ചക്കാരാക്കിയാണ് സുവാരസ് ബാഴ്‌സയുടെ ലീഡ് ഉയര്‍ത്തിയത്. 85-ാം മിനുട്ടില്‍ സൂപ്പര്‍ ടച്ചിലൂടെ മെസ്സി പന്ത് വലയിലെത്തിച്ച് ഹാട്രിക് പൂര്‍ത്തിയാക്കി.