ജിദ്ദ: ജിദ്ദയിലെ ശക്തമായ പൊടിക്കാറ്റില്‍ നാനൂറിലേറെ പേര്‍ ശ്വാസകോശ സംബന്ധമായ അസുഖങ്ങളോടെ ചികിത്സ തേടി. ചൊവ്വാഴ്ച വൈകുന്നേരത്തോടെ പൊടിക്കാറ്റിന് ശമനമുണ്ടായെങ്കിലും ബുധനാഴ്ച വീണ്ടും ശക്തമായ പൊടിക്കാറ്റുണ്ടായി. പൊടിക്കാറ്റിനെ തുടര്‍ന്ന് ജിദ്ദയില്‍ 422 പേര്‍ ചികിത്സ തേടിയതായി ആരോഗ്യമന്ത്രാലയം അറിയിച്ചു. 293 പേര്‍ മെഡിക്കല്‍ സെന്ററുകളിലും 129 പേര്‍ വിവിധ ആശുപത്രികളിലുമാണ് ചികിത്സ തേടിയത്. പൊതുസ്ഥലത്തെ നിര്‍മാണ ജോലികളെയും കച്ചവടത്തെയും കപ്പലുകളുടെ നീക്കങ്ങളെയും കാറ്റ് ബാധിച്ചു.
കാറ്റ് തുടരുമെന്ന കാലാവസ്ഥാ വകുപ്പിന്റെ മുന്നറിയിപ്പിനെ തുടര്‍ന്ന് മേഖലയിലെ മുഴുവന്‍ സ്‌കൂളുകള്‍ക്കും വിദ്യാഭ്യാസ മന്ത്രാലയം അവധി നല്‍കിയിരുന്നു. ജിദ്ദ ഇസ്്‌ലാമിക് പോര്‍ട്ടിലെ ജോലികള്‍ നിര്‍ത്തിവച്ചു. ദൂരക്കാഴ്ച കുറഞ്ഞതിനാലാണ് കപ്പല്‍ ഗതാഗതം നിര്‍ത്തിവച്ചതെന്ന് തുറമുഖ മേധാവി ക്യാപ്റ്റന്‍ അബ്ദുല്ല ബിന്‍ അവാദ് പറഞ്ഞു. ശക്തമായ കാറ്റിനെ തുടര്‍ന്ന് കിങ് അബുദുല്ല കോംപ്ലക്‌സിലെ വയര്‍ലസ് ടവര്‍ നിലംപൊത്തി. ടവര്‍ റിപ്പയര്‍ ചെയ്തു പുനഃസ്ഥാപിക്കുന്ന ജോലി ആരംഭിച്ചിട്ടുണ്ട്. വ്യാഴാഴ്ച വരെ കാലാവസ്ഥാ വ്യതിയാനം തുടരുന്നതിനാല്‍ മീന്‍പിടിക്കാനും ഉല്ലാസത്തിനും കടലില്‍ പോകുന്നവരോട് ആവശ്യമായ മുന്‍കരുതലെടുക്കാന്‍ കോസ്റ്റല്‍ ഗാര്‍ഡും സിവില്‍ ഡിഫന്‍സും ആവശ്യപ്പെട്ടു.