മാള: വാട്ടര്‍ അതോറിറ്റി ഉദ്യോഗസ്ഥരുടെ അനാസ്ഥകാരണം കൊടുങ്ങല്ലൂര്‍ മുന്‍സിപ്പാലിറ്റി പ്രദേശത്തു ഒരാഴ്ചയായി കുടിവെള്ളമില്ല.
വൈന്തലയില്‍ നിന്നും പുല്ലൂറ്റിലേക്കു വാട്ടര്‍ ടാങ്കിലേക്കു വെള്ളമെത്തിക്കുന്ന പ്രധാന പൈപ്പിനു പാളയം പറമ്പില്‍ കേടുപാടു സംഭവിച്ചു വെള്ളം പാഴായി പോകുന്നുണ്ടായിരുന്നു.
പൈപ്പിന്റെ കേടുപാടുകള്‍ തീര്‍ക്കുന്നതിന് വന്ന കാലതാമസമാണു കൊടുങ്ങല്ലൂരില്‍ കുടിവെള്ളം മുട്ടിച്ചത്.കഴിഞ്ഞ ആറു മാസക്കാലമായി കേടുപാട് സംഭവിച്ച പൈപ്പില്‍ കൂടി വെള്ളം പാഴായി പോകാന്‍ തുടങ്ങിയിട്ട്.
വൈള്ളം പാഴായി പോകുന്നതു കാണാതിരിക്കുവാന്‍ തോടുകീറി സമീപത്തെ കുളത്തിലേക്ക് വെള്ളം ഒഴുക്കി വിടുകയായിരുന്നെന്നു നാട്ടുകാര്‍ പറയുന്നു.
ലക്ഷകണക്കിന് ലിറ്റര്‍ വെള്ളം പാഴായി പോയിരുന്നതിനാല്‍ കൂടുതല്‍ സമയം പമ്പു ചെയ്താണ് പുല്ലൂറ്റുള്ള വാട്ടര്‍ ടാങ്കില്‍ വെള്ളം എത്തിച്ചിരുന്നത്.
ജനങ്ങളുടെ പരാതിയെ തുടര്‍ന്ന് പൈപ്പിന്റെ ഈ ഭാഗം അറ്റകുറ്റപ്പണി തുടങ്ങിയെങ്കിലും കരാറുകാരന്റെയും ഉദ്യോഗസ്ഥരുടെയും മെല്ലെ പോക്കു കാരണം ഒരാഴ്ചയായിട്ടും പണി പൂര്‍ത്തികരിക്കാന്‍ സാധിച്ചിട്ടില്ല.
ആധുനിക സൗകര്യങ്ങള്‍ ഉപയോഗിക്കാതെയാണ് അറ്റകുറ്റപണികള്‍ ചെയ്യുന്നതു മൂലമാണു സമയനഷ്ടം വരുന്നതെന്നു പറയുന്നു.
സംഭവം എം.എല്‍.എയുടെ ശ്രദ്ധയില്‍പ്പെട്ടതിനെ തുടര്‍ന്ന് അടിയന്തിരമായി പണി പൂര്‍ത്തികരിക്കാന്‍ ഉദ്യോഗസ്ഥര്‍ക്ക് കര്‍ശന നിര്‍ദ്ദേശം നല്‍കി.
സി.പി.ഐ മണ്ഡലം സെക്രട്ടറി ടി.എം ബാബു സ്ഥലം സന്ദര്‍ശിച്ചു വാട്ടര്‍ അതോറിറ്റി ഉദ്യോഗസ്ഥരുമായി ചര്‍ച്ച നടത്തി പ്രവര്‍ത്തനങ്ങള്‍ വിലയിരുത്തി.
അടിയന്തിരമായി പണി പൂര്‍ത്തികരിക്കാത്ത പക്ഷം ഉദ്യോഗസ്ഥരുടെ പേരില്‍ നടപടി സ്വീകരിക്കാന്‍ സര്‍ക്കാരിനോട് ആവശ്യപ്പെടുമെന്ന് ടി.എം ബാബു പറഞ്ഞു.
സി.പി.ഐ മാള ലോക്കല്‍ സെക്രട്ടറി സാബു ഏരിമ്മല്‍, ബൈജു മണന്തറ, വി.എം ചന്ദ്രബോസ്, ഷിരണ്‍ എസ് ഷെയ്ഖ് ബാബു, ടി.ആര്‍ അഖില്‍ , ബൈജു പാറേക്കാട്ട് എന്നീ നേതാക്കള്‍ ഒപ്പമുണ്ടായിരുന്നു.