ലണ്ടന്‍: പഞ്ചാബ് നാഷനല്‍ ബാങ്കില്‍ (പി.എന്‍.ബി) നിന്ന് കോടികളുടെ വായ്പയെടുത്തു മുങ്ങിയ സാമ്പത്തിക കുറ്റവാളി നീരവ് മോദിക്കെതിരേ ലണ്ടന്‍ കോടതി അറസ്റ്റ് വാറണ്ട് പുറപ്പെടുവിച്ചു. സാമ്പത്തിക കുറ്റകൃത്യങ്ങള്‍ അന്വേഷിക്കുന്ന എന്‍ഫോഴ്‌സ്‌മെന്റ് ഡയരക്ടറേറ്റിന്റെ (ഇ.ഡി) അഭ്യര്‍ഥനയെത്തുടര്‍ന്നാണ് നടപടി.

ഇ.ഡിയുടെ അഭ്യര്‍ഥനയില്‍ ബ്രിട്ടിഷ് ആഭ്യന്തര സെക്രട്ടറി സാജിദ് വാജിദ് കഴിഞ്ഞ ഓഗസ്റ്റില്‍ ഒപ്പുവച്ചിരുന്നു. അറസ്റ്റ് വാറണ്ട് പുറപ്പെടുവിച്ചതിനാല്‍ വജ്രവ്യാപാരിയായ നീരവ് മോദി ഏതുസമയത്തും ലണ്ടന്‍ പൊലിസിന്റെ പിടിയിലായേക്കും.

നിലവില്‍ വെസ്റ്റ്മിന്‍സ്റ്റര്‍ കോടതിയിലാണ് നീരവ് മോദിക്കെതിരായ കേസുകള്‍ പുരോഗമിക്കുന്നത്. അറസ്റ്റിലായാല്‍ ഉടന്‍ തന്നെ അദ്ദേഹത്തെ ഈ കോടതിയിലാവും ഹാജരാക്കുക. പിന്നീട് കേസിന്റെ തുടര്‍നടപടികള്‍ക്കായി നീരവ് മോദിയെ ഇന്ത്യക്ക് കൈമാറുന്നത് സംബന്ധിച്ച് വെസ്റ്റ് മിന്‍സ്റ്റര്‍ കോടതി ഉത്തരവിടും.

കോടതി ഉത്തരവ് ഇന്ത്യക്ക് അനുകൂലമാവുകയാണെങ്കില്‍ അദ്ദേഹത്തെ വൈകാതെ ബ്രിട്ടന്‍ നാടുകടത്തും. ഉത്തരവിനെതിരേ അപ്പീല്‍ പോവാന്‍ നീരവിനു കഴിയും. പോവുകയാണെങ്കില്‍ കേസ് നടപടികള്‍ വീണ്ടും വൈകും.

പഞ്ചാബ് നാഷനല്‍ ബാങ്കില്‍നിന്ന് നീരവ് മോദിയും അമ്മാവനും ആഭരണ വ്യവസായിയുമായ മെഹുല്‍ ചോക്‌സിയും 13,000 കോടി രൂപ വായ്പയെടുത്തു മുങ്ങിയെന്നാണ് കേസ്. തട്ടിപ്പുമായി ബന്ധപ്പെട്ട് സി.ബി.ഐ കേസെടുക്കുന്നതിനു മുന്‍പ് തന്നെ നീരവും മെഹുല്‍ ചോക്‌സിയും ഇന്ത്യവിട്ടിരുന്നു. കഴിഞ്ഞവര്‍ഷം ജനുവരിയിലാണ് ഇരുവരും ഇന്ത്യ വിട്ടത്. നിലവില്‍ സി.ബി.ഐക്കു പുറമെ ഇ.ഡിയും കേസന്വേഷിക്കുന്നുണ്ട്.