ടോക്ക്യോ: ലോകത്തിലെ ഏറ്റവും പ്രായമുള്ള ഗെയിമിങ് യൂട്യൂബറായി 90കാരി ഗിന്നസ് ബുക്കില്‍. ജപ്പാന്‍ യൂട്യൂബര്‍ ഹമാകോ മോരിയാണ് ഗിന്നസ് ബുക്കില്‍ ഇടംനേടിയത്. 'ഗെയിമര്‍ ഗ്രാന്‍ഡ്മ' എന്ന യൂട്യൂബ് ചാനലിലൂടെയാണ് ഹമാകോ തന്റെ ഗെയിം വിഡിയോകള്‍ പങ്കുവെക്കാറുള്ളത്. 2015ലാണ് ഒരു യൂട്യൂബ് ചാനല്‍ തുടങ്ങിയത്. അതില്‍ ഒരുമാസം നാലു വിഡിയോകള്‍ വരെ പോസ്റ്റ് ചെയ്തു. മൂന്നു ലക്ഷത്തോളം സബ്‌സ്‌ക്രൈബര്‍മാരുള്ള ഈ ചാനലില്‍ നൂറിലധികം വിഡിയോകള്‍ ഹമാകോ പോസ്റ്റ് ചെയ്തിട്ടുണ്ട്.
പ്ലേസ്റ്റോറിലാണ് അമ്മൂമ്മയുടെ ഗെയിം കളി. ജി.ടി.എ 5, കാള്‍ ഓഫ് ഡ്യൂട്ടി, ഡോണ്ട്‌ലസ് തുടങ്ങി വിവിധ ഗെയിമുകളാണ് ഹമാകോ കളിക്കുന്നത്. എന്നാല്‍ ഏറ്റവുമിഷ്ടം ഗ്രാന്റ് തെഫ്റ്റ് ഓട്ടോ പരമ്പരയാണ്. അതോടെ താന്‍ ജീവിതം ആസ്വദിച്ചു തുടങ്ങിയതായി അവര്‍ പറയുന്നു.
'എന്തിലെങ്കിലും ലോകത്തിലെ ഏറ്റവും മികച്ചയാള്‍ ഞാന്‍ ആകുമെന്ന് ഒരിക്കലും കരുതിയിരുന്നില്ല. അതിനുള്ള നന്ദി നിങ്ങള്‍ക്കാണ്- ഹമാകോ പറയുന്നു.