കോഴിക്കോട്: ആയിരക്കണക്കിന് വിശ്വാസികള്‍ പങ്കെടുത്ത ഖത്തം ദുആ മഹാസംഗമത്തോടെ ഇടിയങ്ങര ശൈഖ് പള്ളിയിലെ 458ാം അപ്പവാണിഭ നേര്‍ച്ച സമാപിച്ചു. സമസ്ത കേന്ദ്രമുശാവറ അംഗം മാണിയൂര്‍ അഹ്മദ് മുസ്‌ലിയാര്‍ ഖത്തം ദുആ മഹാസംഗമത്തിന് നേതൃത്വം നല്‍കി.
സംഗമത്തില്‍ എ.വി അബ്ദുറഹ്മാന്‍ മുസ്‌ലിയാര്‍, കെ.കെ.പി അബ്ദുല്ല മുസ്‌ലിയാര്‍, അബ്ദുല്‍ ജലീല്‍ ഫൈസി വെളിമുക്ക്, അബ്ദുല്‍ ഗഫൂര്‍ ഹൈതമി നരിപ്പറ്റ, ഒളവണ്ണ അബൂബക്കര്‍ ദാരിമി, അലി ഫൈസി പാവണ്ണ, ആര്‍.വി കുട്ടിഹസന്‍ ദാരിമി, ടി.വി അഹ്മദ് ദാരിമി, എസ്.കെ ഹംസ ഹാജി, മരക്കാര്‍ ഹാജി തുടങ്ങിയ പണ്ഡിതശ്രേഷ്ഠരും സാദാത്തുക്കളും ഉമറാക്കളും പങ്കെടുത്തു. പത്തു ദിവസം നീണ്ടു നിന്ന നേര്‍ച്ച സാമുദായിക സാമൂഹിക മേഖലകളിലെ വിശിഷ്ട വ്യക്തിത്വങ്ങള്‍ പങ്കെടുത്ത ആത്മീയ വൈജ്ഞാനിക പരിപാടികളെ കൊണ്ട് സമ്പുഷ്ടമായിരുന്നു.
പതിനായിരത്തിലധികം വിശ്വാസികള്‍ക്ക് അന്നദാനം നല്‍കി. ഖത്തം ദുആയോടെ നേര്‍ച്ച സമാപിച്ചെങ്കിലും ഏതാനും ദിവസങ്ങള്‍ കൂടി സ്ത്രീകള്‍ക്കുള്ള സിയാറത്ത് തുടരുന്നതാണ്.