അബ്ദുസ്സലാം കൂടരഞ്ഞി

റിയാദ്: മക്കയിലെ പ്രഥമ പുഷ്പ മേളക്ക് മക്കയില്‍ തുടക്കമായി. സഊദിയുടെ വിവിധ ഭാഗങ്ങളില്‍ പുഷ്പമേള നടക്കുന്നുവെങ്കിലും ഇതാദ്യമായാണ് മക്കയില്‍ പുഷപ മേള അരങ്ങേറുന്നത്. അറബ് അര്‍ബന്‍ ഡവലപ്‌മെന്റ് ഇന്സ്റ്റിറ്റിയൂട്ട്, കിംഗ് സഊദ് സര്‍വ്വാകലാശാല എന്നിവരയുടെ സഹകരണത്തോടെ മക്ക മുനിസിപ്പാലിറ്റി ഹജ്ജിന്റെ പുണ്യ സ്ഥലങ്ങളിലൊന്നായ മുസ്ദലിഫയിലാണ് പൂക്കളുടെ ഉത്സവം സംഘടിപ്പിച്ചത്. പുഷ്പമേളയുടെ ഉദ്ഘാടനം മക്ക ഗവര്‍ണറും സഊദി ഭരണാതികാരി സല്‍മാന്‍ രാജാവിന്റെ ഉപദേഷ്ടാവുമായ ഖാലിദ് അല്‍ ഫൈസല്‍ രാജകുമാരന്‍ ചൊവ്വാഴ്ച ഉദ്ഘാടനം ചെയ്യും .

185 മീറ്റര്‍ നീളത്തിലും 45 മീറ്റര്‍ വീതിയിലുമുള്ള പുഷ്പ പരവതാനിയാണ് ഏറ്റവും വലിയ ആകര്‍ഷണം. വ്യത്യസ്തങ്ങളായ പത്തു ലക്ഷം പൂക്കളാണ് ഇതിനായി ഒരുക്കിയിരിക്കുന്നത്. പുണ്യ ഭൂതിയായ മക്കയുടെ വസന്തം കാണികള്‍ക്ക് ഒരുക്കുന്നതായിരിക്കും മേളയെന്നു മുന്‌സിപ്പാലിറ്റി ഡയറക്റ്റര്‍ റായീദ് സമര്‍ഖന്ദ് പറഞ്ഞു. പുഷ്പ മേളയുടെ ഭാഗമായി മക്ക അന്തരീക്ഷം മോടി പിടിപ്പിക്കുന്നതിനു യോജിച്ച വനവല്‍ക്കരണം എന്ന വിഷയത്തില്‍ രണ്ട് ദിവസത്തെ ചര്‍ച്ചകളും സംഘടിപ്പിച്ചിട്ടുണ്ട്. ഫഌര്‍ ഷോ ഈ മാസം 23 വരെ നീണ്ടു നില്‍ക്കും.
എല്ലാ പ്രായക്കാര്‍ക്കും ആസ്വദിക്കാനുള്ള വിവിധ സ്റ്റാളുകള്‍, കളിസ്ഥലങ്ങള്‍, കരകൗശല സ്റ്റാളുകള്‍, ഭക്ഷണ ശാലകള്‍, സഊദിയുടെ സാംസ്‌കാരികത്തനിമ വിളിച്ചോതുന്ന നാടകങ്ങള്‍, കലാപരിപാടികള്‍ എന്നിവ സജ്ജീകരിച്ചിട്ടുണ്ട്. വൈകുന്നേരം നാല് മുതല്‍ പത്ത് വരെയാണ് ഫഌര്‍ ഷോയിലേക്കുള്ള സൗജന്യ പ്രവേശനം.