തിരുവനന്തപുരം: സംസ്ഥാനം ഇ-മാലിന്യമുക്തമാക്കുന്നതിന്റെ മുന്നോടിയായി സ്‌കൂളുകളില്‍ നിന്ന് പ്രവര്‍ത്തനം ആരംഭിക്കുമെന്ന് ക്ലീന്‍ കേരള കമ്പനി മാനേജിംഗ് ഡയറക്ടര്‍ കബീര്‍ ബി ഹാരുണ്‍. ഇതിന്റെ ഭാഗമായി പ്രത്യേകം തയ്യാറാക്കിയ ബാഗുകള്‍ കുട്ടികള്‍ക്കു നല്‍കും. അതിലൂടെ വീടുകളിലെ ഉപയോഗശൂന്യമായ മൊബൈല്‍ ഫോണുകള്‍, പഴയ ബാറ്ററികള്‍, സിഡികള്‍ തുടങ്ങിയവ ശേഖരിച്ച് സംസ്‌കരിക്കുമെന്ന് അദ്ദേഹം പറഞ്ഞു.
ബൊട്ടാണിക്കല്‍ ഗാര്‍ഡന്‍ റിസര്‍ച്ച് ഇന്‍സ്റ്റിറ്റ്യൂട്ടും, സെന്റര്‍ ഫോര്‍ ഇന്നവേഷന്‍ ഇന്‍ സയന്‍സ് ആന്റ് സോഷ്യല്‍ ആക്ഷന്‍ (സിസ്സ)യും സംയുക്തമായി പ്രിയദര്‍ശിനി പ്ലാനറ്റോറിയത്തില്‍ സംഘടിപ്പിച്ച ശില്‍പ്പശാലയില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. ആറുമാസങ്ങള്‍ക്കുള്ളില്‍ സെക്രട്ടേറിയറ്റ്, കേരള സര്‍വ്വകലാശാല, കുസാറ്റ് തുടങ്ങിയ സ്ഥാപനങ്ങളില്‍ നിന്നും 120 ടണ്‍ ഇ-മാലിന്യങ്ങള്‍ ശേഖരിച്ച് നിര്‍മ്മാര്‍ജ്ജനം ചെയ്യാന്‍ കഴിഞ്ഞതായും അദ്ദേഹം അറിയിച്ചു.
ജവഹര്‍ലാല്‍ നെഹ്‌റു ട്രോപ്പിക്കല്‍ ബൊട്ടാണിക്കല്‍ ഗാര്‍ഡന്‍ റിസര്‍ച്ച് ഇന്‍സ്റ്റിറ്റിയട്ടിലെ ഡോ. എന്‍ എസ് പ്രദീപ,് മലിനീകരണ നിയന്ത്രണ ബോര്‍ഡ് എഞ്ചിനീയര്‍ ശ്രീകല , സിസ്സ സെക്രട്ടറി ജനറല്‍ ഡോ. സി. സുരേഷ് കുമാര്‍ തുടങ്ങിയവര്‍ ചടങ്ങില്‍ പങ്കെടുത്തു.