കോതമംഗലം: ഇടവേളക്ക് ശേഷംകോതമംഗലം നഗരത്തില്‍ വീണ്ടും മോഷണ പരമ്പര. നഗരമധ്യത്തിലെ അഞ്ച് വ്യാപാര സ്ഥാപനങ്ങളിലാണ് ഇന്നലെ പുലര്‍ച്ചെ മോഷണം നടന്നത്. കോളജ് റോഡിലെ വ്യാപാര ഭവന് സമീപമുള്ള ദുപ്പട്ട ചുരിദാര്‍ ഹൗസ്, സാറാസ് ചിക്കന്‍ സെന്റര്‍, ഊട്ടി വെജിറ്റബള്‍ സ്റ്റാള്‍, ഏദന്‍സ് പേ പാര്‍ക്കിങ് സെന്റര്‍, കൊച്ചിന്‍ ഫിഷറീസ് ഫിഷ് സ്റ്റാള്‍ എന്നീ കടകളിലാണ് കഴിഞ്ഞ ദിവസം മോഷണം നടന്നത്. മോഷ്ടാവ് കടയുടെ പൂട്ടുകള്‍ തകര്‍ത്താണ് അകത്ത് കടന്നിരിക്കുന്നത്. പുലര്‍ച്ചെ നാലിനും നാലരക്കും ഇടക്കാണ് മോഷണം നടന്നിരിക്കുന്നത്.
രാത്രി 12 മണിവരെ തൊട്ടടുത്ത് ഹോട്ടലുകള്‍ പ്രവര്‍ത്തിക്കുന്നുണ്ട്. ദുപ്പട്ട ലേഡീസ് ഔട്ട് ഫിറ്റ് എന്ന ഷോപ്പില്‍ മോഷ്ടാവ് താഴറുത്ത് കടയില്‍ പ്രവേശിക്കുന്നതും, പണം അപഹരിക്കുന്നതുമായ ദൃശ്യങ്ങള്‍ സി.സിക്യാമറയില്‍ പതിഞ്ഞിട്ടുണ്ട്. ദുപ്പട്ട വസ്ത്രവ്യാപാര സ്ഥാപനത്തില്‍ നിന്നും ക്യാഷ്‌കൗണ്ടറില്‍ ഇട്ടിരുന്ന 3200 രൂപയുടെ ചില്ലറയാണ് മോഷ്ടാവ് അപഹരിച്ചിരികുന്നത്. മറ്റ് കടകളില്‍ നിന്നും സമാന രീതിയില്‍ ക്യാഷ് കൗണ്ടറില്‍ സൂക്ഷിച്ചിരുന്ന പണമാണ് മോഷ്ടിക്കപ്പെട്ടിരിക്കുന്നത്. കോതമംഗലം പൊലിസ് കേസെടുത്ത് അന്വേഷണം ആരംഭിച്ചു. ഇടവേളകള്‍ക്കുള്ളില്‍ വീണ്ടും മോഷണ പരമ്പര ഉണ്ടാകുന്നതില്‍ വ്യാപാരികള്‍ കടുത്തആശങ്കയിലാണ്, നഗരത്തിലെ വഴിവിളക്കുകള്‍ തെളിയാത്തതും രാത്രി കാല പൊലിസ് പെട്രോളിങിന്റെ അഭാവുമാണ് വീണ്ടും മോഷണങ്ങള്‍ വര്‍ധിക്കാന്‍ കാരണമെന്ന് വ്യാപാരികള്‍ ആരോപിച്ചു.