എരുമപ്പെട്ടി: എരുമപ്പെട്ടി കടങ്ങോട് മണ്ടംപറമ്പില്‍നിന്ന് ചാരായം നിര്‍മിക്കാന്‍ സൂക്ഷിച്ചിരുന്ന നൂറ് ലിറ്റര്‍ വാഷും വാറ്റു ഉപകരണങ്ങളും എരുമപ്പെട്ടി പൊലിസ് പിടികൂടി. ചാരായം വാറ്റിയിരുന്ന മണ്ടംപറമ്പ് പാലക്കല്‍ സുനിലിനെ (46) അഡീഷ്ണല്‍ എസ്.ഐ എ.എ. തങ്കച്ചന്‍ അറസ്റ്റു ചെയ്തു. മണ്ടംപറമ്പ് ചെങ്ങാലിപ്പാടത്തിനോട് ചേര്‍ന്നുള്ള ഇയാളുടെ വീട്ടിലാണ് ഡ്രമ്മിലും വലിയ ചെമ്പുകളിലും വാഷ് കലക്കി സൂക്ഷിച്ചിരുന്നത്. രഹസ്യവിവരം ലഭിച്ചതിന്റെ അടിസ്ഥാനത്തിലാണ് പൊലിസ് പരിശോധന നടത്തിയത്. സീനിയര്‍ സിവില്‍ പൊലിസ് ഓഫിസര്‍മാരായ പി.കെ ഉമേഷ്, സഞ്ജയ്, സിവില്‍ പൊലിസ് ഓഫിസര്‍ സുധാകരന്‍ എന്നിവരും പൊലിസ് സംഘത്തില്‍ ഉണ്ടായിരുന്നു.