ന്യൂഡല്‍ഹി: കൊവിഡ് ലോക്ക്ഡൗണിനിടെ സര്‍വിസ് നടത്തിയ പ്രത്യേക ട്രെയിനുകളിലും ബസുകളിലുമായി ഈ മാസം യാത്ര ചെയ്തത് 91 ലക്ഷം പേരെന്ന് കേന്ദ്രം. ഇന്നലെ ഇതുമായി ബന്ധപ്പെട്ട സുപ്രിംകോടതിയുടെ ചോദ്യത്തിന് സോളിസിറ്റര്‍ ജനറല്‍ തുഷാര്‍ മേത്തയാണ് ഈ മറുപടി നല്‍കിയത്.

തൊഴിലാളികളെ തിരിച്ചെത്തിക്കാന്‍ ഒട്ടേറെ നടപടികള്‍ കേന്ദ്രസര്‍ക്കാര്‍ സ്വീകരിച്ചിട്ടുണ്ടെന്നും അവയൊക്കെ നേരത്തെ സുപ്രിംകോടതിക്കു ബോധ്യമായതാണെന്നും അദ്ദേഹം കോടതിയില്‍ പറഞ്ഞു. എന്നാല്‍, സര്‍ക്കാരിന് വീഴ്ചകള്‍ സംഭവിച്ചിട്ടുണ്ടെന്നായിരുന്നു കോടതി വ്യക്തമാക്കിയത്.സോളിസിറ്റര്‍ ജനറലിനോട് കോടതി വിവിധ വിഷയങ്ങളില്‍ മറുപടി ആരാഞ്ഞു. അതിഥി തൊഴിലാളികളെ തിരിച്ചെത്തിക്കുന്നതിന് നിശ്ചയിക്കപ്പെട്ട സമയമെത്ര, അവര്‍ക്കുള്ള യാത്രകള്‍ക്കായി എന്തൊക്കെ മുന്നൊരുക്കങ്ങള്‍ നടത്തി, യാത്രാവിവരം അവരെ കൃത്യമായി അറിയിക്കുന്നത് എങ്ങനെയാണ്, അവരില്‍നിന്ന് യാത്രയ്ക്ക് പണം ഈടാക്കുന്നുണ്ടോ, ഇല്ലെങ്കില്‍ പണം നല്‍കുന്നത് ആരാണ്, ഭക്ഷണ ലഭ്യത ഉറപ്പുവരുത്തിയിട്ടുണ്ടോ തുടങ്ങി നിരവധി ചോദ്യങ്ങളാണ് സുപ്രിംകോടതി ഉന്നയിച്ചത്.ഇക്കാര്യങ്ങളില്‍ വ്യക്തമായ മറുപടി ലഭിക്കാതിരുന്നതോടെ, തൊഴിലാളികളുടെ വിഷയത്തില്‍ കൃത്യമായ നയം വേണമെന്നു കോടതി ആവശ്യപ്പെടുകയും ചെയ്തു.