തൃശൂര്‍: കോര്‍പറേഷനിലെ ശുചീകരണ വിഭാഗത്തില്‍ ജോലി ചെയ്യുന്ന അമ്പതോളം തൊഴിലാളികള്‍ക്ക് മിനിമം വേതനം ഉറപ്പാക്കണമെന്നാവശ്യപ്പെട്ട് കേരള സ്റ്റേറ്റ് ക്ലീനിങ് ഡെസ്റ്റിനേഷന്‍ വര്‍ക്കേഴ്‌സ് യൂനിയന്‍ സമരത്തിലേക്ക്.
കോര്‍പറേഷനില്‍ ക്ലീനിങ് ഡെസ്റ്റിനേഷന്‍ ക്യാംപയ്‌നിന്റെ ഭാഗമായി നിലവില്‍ 69 രൂപക്കാണ് തൊഴിലാളികള്‍ ജോലി ചെയ്യുന്നത്. ഇവരെ സ്ഥിരപ്പെടുത്തി മിനിമം വേതനം നല്‍കണമെന്ന് യൂനിയന്‍ ജനറല്‍ സെക്രട്ടറി പി. കൃഷ്ണമ്മാള്‍ ആവശ്യപ്പെട്ടു. സമര പ്രഖ്യാപനത്തിന്റെ ഭാഗമായി ജൂലൈ നാലിന് ജില്ലാ ടൂറിസം പ്രമോഷനല്‍ ഓഫിസിനു (ഡി.ടി.പി.സി) മുന്‍പില്‍ തൊഴിലാളികള്‍ സത്യാഗ്രഹം നടത്തും.
ന്യൂ ട്രേഡ് യൂനിയന്‍ ഇനിഷേറ്റീവ് (എന്‍.ടി.യു.ഐ) സംസ്ഥാന പ്രസിഡന്റ് എം. ശ്രീകുമാര്‍ ഉദ്ഘാടനം ചെയ്യും. ജൂലൈ അഞ്ചിന് കോര്‍പറേഷനു മുന്‍പില്‍ നടത്തുന്ന സത്യാഗ്രഹം എന്‍.ടി.യു.ഐ സംസ്ഥാന ജന.സെക്രട്ടറി അബ്ദുള്‍ ലത്തീഫ് ഉദ്ഘാടനം ചെയ്യും. 2005 മുതലുള്ള ശബളകുടിശിക നല്‍കുക, മഴക്കാലത്ത് സുരക്ഷ ഉപകരണങ്ങളും പണി ആയുധങ്ങളും ഉറപ്പാക്കുക, ഇ.എസ്.ഐ, പി.എഫ് മുന്‍കാല പ്രാബല്യത്തോടുകൂടി നടപ്പിലാക്കുക എന്നീ ആവശ്യങ്ങളും സമരത്തില്‍ ഉന്നയിക്കുമെന്നു യൂനിയന്‍ സംസ്ഥാന പ്രസിഡന്റ് വിശ്വകല തങ്കപ്പന്‍, കെ.എസ് യശോദര ദേവി പറഞ്ഞു.