മട്ടാഞ്ചേരി: കടലിന്റെ അടിത്തട്ടില്‍ വസിക്കുന്ന സ്റ്റാര്‍ ഫിഷുകള്‍ തീരത്തെത്തിയത് കൗതുകമായി. മാനാശ്ശേരി ഫിഷിംഗ് ഗ്യാപ്പിലാണ് നാട്ടുകാര്‍ക്ക് കൗതുകം ഉണര്‍ത്തി നക്ഷത്ര മത്സ്യങ്ങള്‍ വിരുന്നെത്തിയത്.
ഏതാണ്ട് നാലിഞ്ചോളം നീളം വരുന്ന നേര്‍ത്ത കൈകളോടുകൂടിയ ഇവ കുഞ്ഞുങ്ങളാണെന്നാണ് മത്സ്യതൊഴിലാളികള്‍ പറയുന്നത്. സാധാരണയായി കടലിന്റെ അടിത്തട്ടില്‍ മണ്ണിനോട് ചേര്‍ന്നാണ് ഇവയുടെ വാസം. തീരത്തോട് ചേര്‍ന്ന് ഇവയെ കാണാറില്ലെന്നാണ് ഇവര്‍ പറയുന്നത്.
നക്ഷത്ര മത്സ്യങ്ങള്‍ തീരത്തണഞ്ഞതു കാണാന്‍  എത്തിയവര്‍  ക്യാമറയില്‍ പകര്‍ത്തി. കുട്ടികള്‍ ഇവയെ പിടിക്കുന്നത് മുതിര്‍ന്നവര്‍ തടഞ്ഞു.
ഏതാണ്ട് രണ്ടു മണിക്കൂറോളം തീരത്ത് കളിച്ചു നടന്ന ഇവ പിന്നീട്  തിരമാലകള്‍ക്കൊപ്പം അപ്രത്യക്ഷമായി.