ഹേഗ്: രണ്ടാംലോക മഹായുദ്ധാനന്തരം യൂറോപ്പ് കണ്ട ഏറ്റവും ക്രൂരമായ കൂട്ടക്കൊലയ്ക്കു നേതൃത്വം നല്‍കിയ സെര്‍ബ് ഭീകരന്‍ റാദൊവന്‍ കരാജിച്ചിനു ജീവപര്യന്തം തന്നെ. ഹേഗിലെ യു.എന്‍ രാജ്യാന്തര കോടതിയുടെതാണ് വിധി. കരാജിച്ചിന്റെ അപ്പീല്‍ തള്ളിയാണ് യു.എന്‍ കോടതി ശിഷ്ടകാലവും അദ്ദേഹത്തോട് ജയിലില്‍ തുടരാന്‍ ആവശ്യപ്പെട്ടത്. ഇതോടെ 74 കാരനായ സെര്‍ബ് മുന്‍ പ്രസിഡന്റ് 40 വര്‍ഷം കൂടി തടവില്‍ കഴിയണം. കേസില്‍ കരാജിച്ചിനെ ശിക്ഷിച്ചുള്ള 2016ലെ ഉത്തരവ് ചോദ്യംചെയ്താണ് അദ്ദേഹം യു.എന്‍ അപ്പീല്‍ കോടതിയില്‍ അപേക്ഷനല്‍കിയത്. എന്നാല്‍ ഈ അപേക്ഷയും തള്ളിയതോടെ ഇനി അദ്ദേഹത്തിന് ശിക്ഷ ചോദ്യംചെയ്യാനാവില്ല.

ആരോപണങ്ങള്‍ അടിസ്ഥാനരഹിതവും കേട്ടുകേള്‍വിയുടെ അടിസ്ഥാനത്തിലുള്ളതുമാണെന്നും ഇന്നലെ അദ്ദേഹത്തിന്റെ അഭിഭാഷകന്‍ വാദിച്ചു. മുസ്‌ലിംകളെ വംശഹത്യചെയ്‌തെന്ന ആരോപണം കെട്ടുകഥയാണെന്നും അഭിഭാഷകന്‍ പറഞ്ഞു. എന്നാല്‍, ഈ വാദങ്ങളെല്ലാം തള്ളിയ കോടതി, വളരെ ആസൂത്രണസ്വഭാവത്തോടെയുള്ള കുറ്റകൃത്യത്തിന് ഈ ശിക്ഷപോരെന്ന് ചൂണ്ടിക്കാട്ടി. കരാജിച്ചും മറ്റു സെര്‍ബ് നേതാക്കളും സംഘടിതവും വ്യവസ്ഥാപിതവുമായാണ് കൂട്ടക്കൊല നടത്തിയതെന്ന് ജഡ്ജി വാന്‍ ജോണ്‍സന്‍ വ്യക്തമാക്കി. കോടതി ഉത്തരവ് വായിക്കുമ്പോള്‍ ചേംബറില്‍ നിര്‍വികാരനായി അദ്ദേഹം ഇരുന്നു. വിചാരണകേള്‍ക്കാന്‍ കൂട്ടക്കൊലയുടെ ഇരകളുടെ ബന്ധുക്കളും കോടതിയിലെത്തിയിരുന്നു. ബോസ്‌നിയന്‍ മുസ്‌ലിംകളെയും വംശീയന്യൂനപക്ഷവിഭാഗമായ ക്രോട്ടുകളെയും തുടച്ചുനീക്കുന്നതിനും ബോസ്‌നിയന്‍ സെര്‍ബുകളുടെ ഏകജാതിയ രാഷ്ട്രം സൃഷ്ടിക്കുന്നതിനുമുള്ള ആക്രമണങ്ങള്‍ക്ക് കരാജിച്ച് നേതൃത്വം നല്‍കിയെന്നു നേരത്തെ യു.എന്‍ കോടതി കണ്ടെത്തിയിരുന്നു.

ബോസ്‌നിയയിലും മുന്‍ യൂഗൊസഌവിയയുടെ മറ്റു ചില ഭാഗങ്ങളിലും 90കളില്‍ പൊട്ടിപ്പുറപ്പെട്ട ആഭ്യന്തരയുദ്ധം രണ്ടാംലോകമഹായുദ്ധത്തിനു ശേഷമുള്ള കറുത്ത അധ്യായമാണ്. മൊത്തം ഒരു ലക്ഷം പേര്‍ മരിക്കുകയും 22 ലക്ഷം പേര്‍ വഴിയാധാരമാവുകയും ചെയ്തു. ഇതിനിടെ നടന്ന വിവിധ കൂട്ടക്കൊലകളില്‍ കരാജിച്ചിനു പുറമെ യുഗോസ്ലാവ്യന്‍ മുന്‍ നേതാവ് മിലോസേവിച്ച്, സെര്‍ബ് സൈന്യത്തലവന്‍ റാദ്‌കോ മഌദിച്ച് തുടങ്ങിയവരും ശിക്ഷിക്കപ്പെട്ടിരുന്നു.

1995 ജൂലൈയില്‍ സെബ്രനിക്കയില്‍ 8,000 ഓളം ബോസ്‌നിയന്‍ മുസ്‌ലിംകളെയാണ് വെടിവച്ചുകൊന്നത്. 12നും 77 വയസ്സിനും ഇടയ്ക്കു പ്രായമുള്ള പുരുഷന്മാരെ ചെറിയ ഗ്രൂപ്പുകളായി തിരിച്ചു യന്ത്രത്തോക്കു കൊണ്ടു വെടിവച്ചുകൊല്ലുകയായിരുന്നു. മൃതദേഹങ്ങള്‍ ബുള്‍ഡോസറുകള്‍ കൊണ്ടുതള്ളി വലിയ കുഴികളിലിട്ടു മൂടി. നൂറുകണക്കിനു പേരെ ജീവനോടെയും കുഴിച്ചിട്ടു. ഈ കൊടും പൈശാചികത കണ്ട് മഌദിച്ചിന്റെ സുഹൃത്തുക്കളായ സെര്‍ബ് നേതാക്കള്‍ വരെ സ്തബ്ദരായെന്നും മെഡിക്കല്‍ വിദ്യാര്‍ഥിനിയായിരുന്ന ഏക മകള്‍ മാനസികാഘാതം താങ്ങാനാവാതെ ജീവനൊടുക്കിയെന്നും മാധ്യമങ്ങള്‍ റിപ്പോര്‍ട്ട്‌ചെയ്തിരുന്നു.