കൊല്ലം: അയത്തില്‍-മേവറം ബൈപ്പാസ് റോഡില്‍ സ്വകാര്യബസും മണ്ണുകയറ്റിവന്ന ടിപ്പര്‍ ലോറിയും കൂട്ടിയിടിച്ച് 9 പേര്‍ക്ക് പരുക്ക്. ഇന്നലെ രാവിലെ 7.30നായിരുന്നു അപകടം. അപകടത്തില്‍ പരുക്കേറ്റ ലോറി ഡ്രൈവര്‍ കൊട്ടിയം സിതാര ജങ്ഷന്‍ വാഴപ്പള്ളി തൊടിയില്‍ സുജിത്(32), ബസ് ഡ്രൈവര്‍ ഷിഹാബ്(48), ബസിലെ യാത്രക്കാരായ കുമാരന്‍, രാഖി, റഷീദ, ബാലു, ചന്ദ്രന്‍പിള്ള, കുമാര്‍, ബിജു എന്നിവരെ മേവറത്തെ സ്വകാര്യ മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചു. സുജിതിന് കാലിനും ഷിഹാബിനു കാലിനും തലയ്ക്കുമാണ് പരുക്ക്.
അമിത വേഗത്തിലായിരുന്ന ടിപ്പറിന്റെ ആക്‌സില്‍ ഒടിഞ്ഞതിനെ തുടര്‍ന്ന് നിയന്ത്രണം നഷ്ടപ്പെട്ടതാണ് അപകടത്തിന് കാരണം. ഇരുവാഹനങ്ങളിലും കാബിനുകളില്‍ കുടുങ്ങിയ ഡ്രൈവര്‍മാരെ വാഹനങ്ങള്‍ വെട്ടിപ്പൊളിച്ചാണ് പൊലിസും ഫയര്‍ഫോഴ്‌സും നാട്ടുകാരും ചേര്‍ന്നു പുറത്തെടുത്തത്. ഇടിയുടെ ആഘാതത്തില്‍ ടിപ്പര്‍ റോഡിലേക്ക് മറിയുകയായിരുന്നു. ബൈപ്പാസ് റോഡില്‍ സര്‍വ്വീസ് നടത്തുന്ന എ.വി.കെ ട്രാവല്‍സ് ബസ് അയത്തില്‍ നിന്നും മേവറത്തേക്കുവരികയായിരുന്നു.