വാളയാര്‍ : എക്‌സൈസിനു പിന്നാലെ ലഹരിക്കടത്തു തടയാന്‍ പൊലീസും സംസ്ഥാന അതിര്‍ത്തി കേന്ദ്രീകരിച്ചുള്ള ബോര്‍ഡര്‍ പട്രോളിങ് ആരംഭിച്ചു.
മദ്യശാലകള്‍ക്കു പൂട്ടു വീണ സാഹചര്യത്തില്‍ ഇതരസംസ്ഥാനങ്ങളില്‍ നിന്നു വന്‍തോതില്‍ മദ്യവും, ലഹരിവസ്തുക്കളും കടത്താന്‍ സാധ്യതയുണ്ടെന്ന ഇന്റലിജന്‍സ് മുന്നറിയിപ്പിനെ തുടര്‍ന്നാണിത്. ജില്ലാ പൊലീസ് മേധാവി പ്രദീഷ്‌കുമാറിന്റെ ഉത്തരവ് അടിസ്ഥാനത്തില്‍  വാളയാര്‍  ഉള്‍പ്പെടെയുള്ള  സംസ്ഥാന അതിര്‍ത്തികളില്‍ 24 മണിക്കൂര്‍ പട്രോളിങ് പൊലീസ് തുടങ്ങി.
ഈസ്റ്റര്‍, വിഷു കണക്കിലെടുത്ത് മൂന്നാഴ്ച നീളുന്ന പരിശോധനയ്ക്കാണ് നിര്‍ദേശം. സി.ഐ.ആര്‍ ഹരിപ്രസാദ്, എസ്.ഐമാരായ എ.പ്രതാപന്‍,റിന്‍സണ്‍ എം. തോമസ്, പിന്‍സണ്‍ ജോസഫ് എന്നിവരുടെ നേതൃത്വത്തിലാണ് പരിശോധന.
സ്വകാര്യ വാഹനങ്ങളും കെ.എസ്. ആര്‍ടി സി ബസുള്‍പ്പെടെയുള്ള വാഹനങ്ങളും പരിശോധിക്കുന്നുണ്ട്. ചെക്‌പോസ്റ്റ് വെട്ടിച്ചു വാഹനങ്ങള്‍ കടക്കാന്‍ സാധ്യതയുള്ളതിനാല്‍ ഊടുവഴികളിലും പരിശോധന കര്‍ശനമാക്കി. വ്യാജ വാറ്റിനു സാധ്യതയുള്ള  വാളയാര്‍, കഞ്ചിക്കോട് മേഖലകളില്‍  എക്‌സൈസിനൊപ്പം സഹകരിച്ച് പരിശോധനയും പ്രത്യേക നിരീക്ഷണവും ഏര്‍പ്പെടുത്തിയിട്ടുണ്ട്.
പ്രദേശത്തെ കള്ളുഷാപ്പുകളും പ്രത്യേക നിരീക്ഷണത്തിലാകും. മുന്‍വര്‍ഷങ്ങളില്‍ വിഷു, ഈസ്റ്റര്‍ കടന്നു വരുന്ന ഏപ്രിലില്‍ വ്യാജ കള്ളിന്റെ വില്‍പന എക്‌സൈസിനും പൊലീസിനും തലവേദനയാകാറുണ്ട്. കോടതി വിധി അനുസരിച്ച് കൂടുതല്‍ ഷാപ്പുകള്‍ പൂട്ടേണ്ടി വന്നതോടെ തുറന്നു പ്രവര്‍ത്തിക്കുന്ന മറ്റിടങ്ങളില്‍ വലിയ തിരക്കാണുള്ളത്. പലയിടത്തും ഉച്ചയോടെ തന്നെ കള്ളു കച്ചവടം തീരുന്നുണ്ട്.
ആവശ്യക്കാര്‍ പിന്നെയും  കൂടുന്നതോടെയാണ് വ്യാജന്‍ ഇടപിടിക്കാന്‍ സാധ്യത കല്‍പിക്കുന്നത്. ഇത്തവണയുണ്ടായ പ്രത്യേക സാഹചര്യത്തില്‍ പ്രത്യേക  ജാഗ്രത പുലര്‍ത്താനാണ് തീരുമാനം. തുടര്‍ന്നുള്ള ദിവസങ്ങളില്‍ സംസ്ഥാന അതിര്‍ത്തിയിലുള്ള പൊലീസിന്റെ രാത്രികാല പരിശോധന കര്‍ശനമാക്കുകയാണ്.