ന്യൂഡല്‍ഹി: ഭീമാകൊറേഗാവ് കേസില്‍ അറസ്റ്റിലായ ആക്ടിവിസ്റ്റ് ഗൗതം നവ്‌ലാഖയെ ഡല്‍ഹിയില്‍നിന്നു ധൃതിപ്പെട്ട് മുംബൈയിലേക്കു മാറ്റിയ എന്‍.ഐ.എയുടെ നടപടിയെ ചോദ്യം ചെയ്ത് ഡല്‍ഹി ഹൈക്കോടതി. വിഷയത്തില്‍ എന്‍.ഐ.എ അനാവശ്യ തിടുക്കം കാണിച്ചെന്ന് ജസ്റ്റിസ് അനൂപ് ജയറാമിന്റെ നേതൃത്വത്തിലുള്ള ബെഞ്ച് നിരീക്ഷിച്ചു. നേരത്തെ, നവ്‌ലാഖയെ മുംബൈയിലേക്കു മാറ്റുന്നത് തങ്ങളെ അറിയിച്ചില്ലെന്ന ആരോപണവുമായി അദ്ദേഹത്തിന്റെ കുടുംബവും അഭിഭാഷകരും രംഗത്തെത്തിയിരുന്നു.
നവ്‌ലാഖയുടെ ഇടക്കാല ജാമ്യാപേക്ഷ കോടതിയുടെ പരിഗണനയിലിരിക്കുകയും കേസില്‍ റിപ്പോര്‍ട്ട് സമര്‍പ്പിക്കാന്‍ എന്‍.ഐ.എതന്നെ കൂടുതല്‍ സമയം ആവശ്യപ്പെടുകയും ചെയ്ത സാഹചര്യത്തില്‍ എന്തിനാണ് ധൃതിപ്പെട്ടുള്ള ഈ നീക്കമെന്ന് കോടതി ചോദിച്ചു.
അന്വേഷണോദ്യോഗസ്ഥനോട് വിഡിയോ കോണ്‍ഫറന്‍സിങ്ങിലൂടെ കാര്യങ്ങള്‍ ചോദിച്ചറിഞ്ഞ കോടതി, കേസ് ജൂണ്‍ മൂന്നിലേക്കു മാറ്റി.