കൊല്ലം: പി.ഡി.പി ചെയര്‍മാന്‍ അബ്ദുല്‍ നാസര്‍ മഅ്ദനി ഇന്ന് ശാസ്താംകോട്ടയിലെ അന്‍വാര്‍ശ്ശേരിയില്‍ നിന്നും കര്‍ണാടകയിലേക്ക് മടങ്ങും. രാത്രി 10ന് തിരുവനന്തപുരത്ത് നിന്നുള്ള ഇന്‍ഡിഗോ വിമാനത്തിലാണ് മഅ്ദനി തിരിച്ചുപോകുന്നത്.

സുപ്രീം കോടതി അനുമതിയോടെ ഇക്കഴിഞ്ഞ 5ന് പുലര്‍ച്ചെയാണ് അബ്ദുല്‍ നാസര്‍ മഅ്ദനി അസുഖബാധിതയായ മാതാവ് അസ്മാ ബീവിയെ സന്ദര്‍ശിക്കുന്നതിനായി അന്‍വാര്‍ശ്ശേരിയിലെത്തിയത്. എട്ടു ദിവസത്തെ അനുമതിയാണ് മഅ്ദനിക്ക് സുപ്രീം കോടതി നല്‍കിയിരുന്നത്. യാത്രയ്ക്കു മുന്നോടിയായി ഉച്ചയ്ക്ക് 12.30 ന് അന്‍വാര്‍ശ്ശേരിയില്‍ പ്രത്യേക പ്രാര്‍ത്ഥന സംഘടിപ്പിച്ചിട്ടുണ്ട്.

അന്‍വാര്‍ശ്ശേരിയിലെ കുട്ടികള്‍ക്ക് പുറമേ നൂറുകണക്കിന് ആളുകള്‍ ചടങ്ങില്‍ പങ്കെടുക്കും. നാട്ടിലെത്തിയ മഅ്ദനിയുടെ ആരോഗ്യ നില വഷളായതിനെത്തുടര്‍ന്ന് അദ്ദേഹത്തെ ഇക്കഴിഞ്ഞ വ്യാഴാഴ്ച്ച് കൊല്ലത്തെ സ്വകാര്യ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരുന്നു. ഈ ദിവസം ഒഴികെ നാട്ടിലുണ്ടായിരുന്ന എല്ലാ ദിവസങ്ങളിലും മഅ്ദനി മൈനാഗപ്പളളിയിലെ വസതിയിലെത്തി മാതാപിതാക്കളെ സന്ദര്‍ശിച്ചു. ദിവസവും ദൂരെ സ്ഥലങ്ങളില്‍ നിന്നും നുറുകണക്കിനുപേരാണ് മഅ്ദനിയെ സന്ദര്‍ശിക്കാനായി അന്‍വാര്‍ശ്ശേരിയിലെത്തിയിരുന്നത്.