റിയാദ്: സഊദിയിൽ സ്‌പോൺസറായ വൃദ്ധയെ സ്വന്തം വേലക്കാരി കുത്തിക്കൊന്നു. തെക്കു പടിഞ്ഞാറൻ പ്രദേശമായ അസീർ പ്രവിശ്യയിലെ അൽമജാരിദ നഗരിയിലാണ് അറുപത് വയസിലധികം പ്രായമുള്ള സഊദി വനിത കൊല്ലപ്പെട്ടത്. സംഭവത്തിൽ പ്രതിയായ വീട്ടു വേലക്കാരിയെ പോലീസ് അറസ്‌റ്റ് ചെയ്‌തിട്ടുണ്ട്‌. ആഫ്രിക്കൻ രാജ്യമായ ഉഗാണ്ടയിൽ നിന്നും മൂന്നു മാസം മുമ്പ് ജോലിക്കെത്തിയ യുവതിയാണ് പിടിയിലായത്. യുവതി ഒമ്പത് തവണ സ്‌പോൺസറെ കുത്തിയതായി അന്വേഷണത്തിൽ വ്യക്തമായി. വിവരമറിഞ്ഞെത്തിയ പോലീസുകാർ മുറിയിൽ ഒളിച്ചു നിന്ന യുവതിയെ വാതിൽ തകർത്ത് അകത്ത് കടന്നാണ് പിടികൂടിയത്. യുവതിയുടെ ശരീരത്തിലും ഏതാനും മുറിവേറ്റ പാടുകളുണ്ട്. യുവതി ആത്മഹത്യ ചെയ്യാനുള്ള ശ്രമമാണ് നടത്തിയതെന്ന് റിപ്പോർട്ടിൽ പറയുന്നു.