കൊച്ചി: വിഷ മത്സ്യത്തെ തിരിച്ചറിയുന്നതിന് കൊച്ചിയിലെ സെന്‍ട്രല്‍ ഇന്‍സ്റ്റിറ്റ്യൂട്ട് ഓഫ് ഫിഷറീസ് ടെക്‌നോളജി (സി.ഐ.എഫ്.ടി)വികസിപ്പിച്ചെടുത്ത റാപിഡ് ഡിറ്റക്ഷന്‍ കിറ്റിന്റെ സാങ്കേതിക വിദ്യ നിര്‍മാതാക്കള്‍ക്ക് കൈമാറി. 

മുംബൈ ആസ്ഥാനമായി പ്രവര്‍ത്തിക്കുന്ന ഹൈമീഡിയ ലബോറട്ടറീസായിരിക്കും കിറ്റുകള്‍ നിര്‍മിക്കുക. കമ്പനിയിലെ ഉദ്യോഗസ്ഥര്‍ക്ക് സി.ഐ.എഫ്.ടി അധികൃതര്‍ തിങ്കളാഴ്ച മുതല്‍ പരിശീലനം നല്‍കും. സിഫ് ടെസ്റ്റ് എന്ന പേരില്‍ വികസിപ്പിച്ച സാങ്കേതികവിദ്യ ഉപയോഗിച്ച് വ്യാവസായികാടിസ്ഥാനത്തില്‍ കിറ്റ് ഉല്‍പാദിപ്പിച്ച് വിപണിയിലിറക്കാനാണ് ഹൈ മീഡിയ ലബോറട്ടറീസുമായി ധാരണയിലെത്തിയിരിക്കുന്നത്. ജൂലൈ ആദ്യവാരം കിറ്റുകള്‍ വിപണിയിലെത്തുമെന്നാണ് സൂചന.
മത്സ്യത്തിലെ അമോണിയ, ഫോര്‍മാലിന്‍ രാസവസ്തുക്കളുടെ സാന്നിധ്യം വേഗത്തില്‍ കണ്ടെത്താന്‍ കിറ്റുകളുടെ ഉപയോഗംമൂലം സാധിക്കും. ചെറിയ കുപ്പി രാസലായിനിയും പേപ്പര്‍ സ്ട്രിപ്പും അടങ്ങുന്ന കിറ്റ് ഉപയോഗിച്ച് സാധാരണക്കാര്‍ക്ക് പോലും മത്സ്യത്തിലെ വിഷാംശം തിരിച്ചറിയാനാകുമെന്നതാണ് പ്രത്യേകത. രണ്ടുമുതല്‍ മൂന്നു രൂപവരെ ഉല്‍പാദനച്ചെലവു പ്രതീക്ഷിക്കുന്ന സ്ട്രിപ്പ് അഞ്ചുരൂപയ്ക്ക് താഴെ വിപണിയിലെത്തിക്കാനാണ് ലക്ഷ്യമിടുന്നത്.
കൊച്ചി സെന്‍ട്രല്‍ ഇന്‍സ്റ്റിറ്റ്യൂട്ട് ഓഫ് ഫിഷറീസ് ടെക്‌നോളജിയിലെ ശാസ്ത്രജ്ഞരായ ലാലിയും പ്രിയയും ചേര്‍ന്നാണ് സാങ്കേതിക വിദ്യ വികസിപ്പിച്ചെടുത്തത്.
ഇതര സംസ്ഥാനങ്ങളില്‍ നിന്ന് വന്‍തോതില്‍ വിഷം കലര്‍ന്ന മത്സ്യം എത്തുന്നുണ്ടെന്ന പരാതിയെ തുടര്‍ന്നാണ് സി.ഐ.എഫ്.ടി റാപിഡ് ഡിറ്റക്ഷന്‍ കിറ്റ് വികസിപ്പിച്ചത്.