തിരുവനന്തപുരം: ടോം ജോസ് പുതിയ ചീഫ് സെക്രട്ടറിയായി ഇന്ന് ചുമതലയേല്‍ക്കും. നിലവിലെ ചീഫ് സെക്രട്ടറി പോള്‍ ആന്റണി വിരമിക്കുന്ന ഒഴിവിലേക്കാണ് ടോം ജോസിനെ നിയമിച്ചത്.

കേരള കേഡറിലെ ഐ.എ.എസ് ഉദ്യോഗസ്ഥരായ എ.കെ ദുബെ, അരുണ സുന്ദര്‍രാജ് എന്നിവര്‍ ടോം ജോസിനെക്കാള്‍ മുതിര്‍ന്ന ഉദ്യോഗസ്ഥരാണെങ്കിലും ഇരുവരുമിപ്പോള്‍ കേന്ദ്ര സര്‍വിസിലാണ്. ഇവര്‍ സംസ്ഥാന സര്‍വിസിലേക്കു തിരിച്ചുവരാത്ത സാഹചര്യത്തിലാണ് ടോം ജോസിനെ പരിഗണിച്ചത്.

ടോം ജോസിന് 2020 മെയ് 31 വരെ സര്‍വിസുണ്ട്. നിലവില്‍ തൊഴില്‍, ജലവിഭവം, നികുതി വകുപ്പുകളുടെ അഡിഷനല്‍ ചീഫ് സെക്രട്ടറിയാണ്.

ടോം ജോസ് ചീഫ് സെക്രട്ടറി ആകുന്നതോടെ ചീഫ് ഇലക്ടറല്‍ ഓഫിസര്‍ ടിക്കാറാം മീണക്ക് അഡിഷനല്‍ ചീഫ് സെക്രട്ടറിയായി സ്ഥാനക്കയറ്റം ലഭിക്കും.