തിരുവനന്തപുരം: സംസ്ഥാനത്തിന്റെ ടൂറിസം വികസനത്തിനും തീര്‍ഥാടന ടൂറിസത്തിന്റെ സാധ്യതകള്‍ക്കും തിരിച്ചടിയാകുന്ന രീതിയില്‍ 154 കോടി രൂപയുടെ പദ്ധതികള്‍ റദ്ദാക്കിയ കേന്ദ്രനടപടി കേരളത്തോടുള്ള വഞ്ചനയാണെന്ന് മന്ത്രി കടകംപള്ളി സുരേന്ദ്രന്‍.
തുടങ്ങി വച്ച ഈ പദ്ധതികള്‍ ഉപേക്ഷിക്കാനുള്ള തീരുമാനം കേന്ദ്രസര്‍ക്കാര്‍ തിരുത്തണം. ഈ ആവശ്യം ഉന്നയിച്ച് പ്രധാനമന്ത്രിക്ക് മുഖ്യമന്ത്രി കത്തയക്കുമെന്നും കേന്ദ്ര ടൂറിസം മന്ത്രിക്ക് താന്‍ കത്തയക്കുമെന്നും മന്ത്രി വാര്‍ത്താസമ്മേളനത്തില്‍ പറഞ്ഞു.
69.47 കോടിയുടെ ശിവഗിരി ശ്രീനാരായണ ഗുരു തീര്‍ഥാടന സര്‍ക്യൂട്ടും 133 ആരാധനാലയങ്ങള്‍ ക്രേന്ദീകരിച്ചുള്ള 85.22 കോടിയുടെ കേരള സ്പിരിച്വല്‍ സര്‍ക്യൂട്ട് പദ്ധതിയുമാണ് കേന്ദ്രം ഉപേക്ഷിച്ചത്. ശ്രീനാരായണ ഗുരുവിന്റെ ജീവിതവുമായി ബന്ധപ്പെട്ട ചരിത്രപ്രാധാന്യമുള്ള സ്ഥലങ്ങള്‍ കോര്‍ത്തിണക്കിയാണ് ഈ തീര്‍ഥാടന സര്‍ക്യൂട്ട് ആവിഷ്‌കരിച്ചത്.
എന്നാല്‍, സംസ്ഥാന ടൂറിസം വകുപ്പ് മുന്നോട്ടുവച്ച 118 കോടി രൂപയുടെ പദ്ധതി വെട്ടിച്ചുരുക്കി 69.47 കോടി രൂപയുടെ പദ്ധതി നടപ്പാക്കാന്‍ കേന്ദ്ര വിനോദസഞ്ചാര വകുപ്പ് തീരുമാനിക്കുകയായിരുന്നു. മാനദണ്ഡങ്ങള്‍ക്ക് വിരുദ്ധമായി കേന്ദ്ര സര്‍ക്കാര്‍ സ്ഥാപനമായ ഐ.ടി.ഡി.സിയെ പദ്ധതി നടപ്പാക്കാന്‍ ചുമതലപ്പെടുത്തുകയും ചെയ്തു. 2019 ജനുവരിയില്‍ അനുമതി നല്‍കി പ്രവര്‍ത്തനമാരംഭിച്ച പദ്ധതിയാണ് ഇപ്പോള്‍ കേന്ദ്രസര്‍ക്കാര്‍ ഉപേക്ഷിച്ചത്.
സ്വദേശി ദര്‍ശന്‍ പദ്ധതി പ്രകാരമുള്ള കേരള സ്പിരിച്വല്‍ സര്‍ക്യൂട്ടിന്റെ സംസ്ഥാനതല പ്രവൃത്തി ഉദ്ഘാടനം പത്തനംതിട്ട മാക്കാംക്കുന്ന് സെന്റ്സ്റ്റീഫന്‍സ് പാരിഷ് ഹാളില്‍ അന്ന് മിസോറാം ഗവര്‍ണറായിരുന്ന കുമ്മനം രാജശേഖരന്‍ നിര്‍വഹിക്കുകയും ചെയ്തതാണ്.ഈ പദ്ധതി ഉപേക്ഷിച്ചതോടെ, ഡി.പി.ആര്‍ തയാറാക്കാനും മറ്റുമായി ലക്ഷക്കണക്കിന് രൂപയാണ് ഏജന്‍സികള്‍ക്ക് ടൂറിസം വകുപ്പ് നല്‍കേണ്ടി വരുന്നതെന്നും മന്ത്രി പറഞ്ഞു.