കൊല്ലം: അഞ്ചല്‍ ഉത്ര കൊലക്കേസില്‍ പ്രതികളെ വനംവകുപ്പും കസ്റ്റഡിയില്‍ വാങ്ങും. കസ്റ്റഡിക്കായി വനംവകുപ്പ് കോടതിയില്‍ അപേക്ഷ നല്‍കും.
അതേസമയം പ്രതികളുടെ പൊലിസ് കസ്റ്റഡി അഞ്ചുദിവസത്തേക്ക് കൂടി കൊട്ടാരക്കാര കോടതി ഇന്നലെ നീട്ടി നല്‍കി.
പാമ്പിനെ പിടികൂടി അനധികൃതമായി കൈവശം സൂക്ഷിക്കുക,വാഹനത്തില്‍ കടത്തുക,പണം വാങ്ങി വില്‍ക്കുക,പാമ്പിനെ പ്രകോപിപ്പിച്ച് കടിപ്പിച്ചത് ഉള്‍പ്പടെയുള്ള കുറ്റങ്ങളാണ് വനം വകുപ്പ് പ്രതികളായ സൂരജ്,സുരേഷ് എന്നിവര്‍ക്കെതിരേ ചുമത്തുക.
പ്രതികള്‍ക്കെതിരേ വന്യജീവി സംരക്ഷണ നിയമ പ്രകാരം രണ്ടു കേസുകള്‍ റജിസ്റ്റര്‍ ചെയ്തിട്ടുണ്ട് ഈ കേസുകളുടെ അന്വേഷണത്തിനാണ് പ്രതികളെ കസ്റ്റഡിയില്‍ വാങ്ങുന്നത്.
അതേ സമയം ഉത്രയുടെ രക്ഷിതാക്കള്‍ സ്ത്രീധനമായി സൂരജിന് നല്‍കിയ കാര്‍ തന്നെയാണ് ഇയാള്‍ ഉത്രയെ കടിപ്പിച്ച പാമ്പിനെ കടത്താന്‍ ഉപയോഗിച്ചതെന്ന് പ്രതി അന്വേഷണ സംഘത്തോട് വെളിപ്പെടുത്തി. പാമ്പിനെ കടത്തിയ കാറില്‍ നിന്ന് ഫോറന്‍സിക് വിദഗ്ധര്‍ തെളിവുകള്‍ ശേഖരിച്ചു.
പ്രശസ്ത പാമ്പു പിടുത്തകാരനായ വാവ സുരേഷിനെ കേസില്‍ പൊലിസ് സാക്ഷി ആക്കിയേക്കും.
അതിനു മുന്നോടിയായി അന്വേഷണ സംഘം വാവ സുരേഷിന്റെ മൊഴിയെടുത്തിട്ടുണ്ട്.