ഉന്നത സമിതികള്‍ അക്കാദമിക് കാര്യങ്ങള്‍ക്ക് പ്രാധാന്യം നല്‍കണം
തിരുവനന്തപുരം: കേരളത്തിലെ സര്‍വകലാശാല വിദ്യാഭ്യാസത്തിന്റെ ഘടനയില്‍ സമൂല മാറ്റമാണ് സര്‍ക്കാര്‍ ഉദ്ദേശിക്കുന്നതെന്ന് മുഖ്യമന്ത്രി പിണറായി വിജയന്‍. പ്രതിവാര സംവാദ പരിപാടിയായ 'നാം മുന്നോട്ടില്‍' സംസാരിക്കുകയായിരുന്നു അദ്ദേഹം. സര്‍വകലാശാലകളില്‍ പുതിയ ചുമതലകള്‍ നല്‍കുമ്പോള്‍ സീനിയോറിറ്റിക്കൊപ്പം കഴിവും മാനദണ്ഡമാക്കണം. സര്‍വകലാശാലകളിലെ ഉന്നത സമിതികള്‍ അക്കാദമിക് കാര്യങ്ങള്‍ക്കാണ് കൂടുതല്‍ പ്രാധാന്യം നല്‍കേണ്ടത്.
സര്‍വിസ് കാര്യങ്ങള്‍ അതു കഴിഞ്ഞേ വരേണ്ടതുള്ളൂ. വിദ്യാഭ്യാസ രംഗത്തെ മാറ്റങ്ങള്‍ കാലഘട്ടത്തിന്റെ ആവശ്യമാണ്. മാറ്റങ്ങള്‍ക്ക് അധ്യാപകരും തയാറാവണമെന്നും മുഖ്യമന്ത്രി പറഞ്ഞു.
കൊവിഡ് എന്ന വലിയ ദുരന്തത്തെയാണ് നേരിടേണ്ടി വന്നതെങ്കിലും ഇതിനെ ഒരു അവസരമായി കാണണം. ലോകത്തിന്റെ പല ഭാഗത്തുനിന്നും വ്യവസായങ്ങളെ ഇവിടേക്ക് ആകര്‍ഷിക്കാന്‍ സര്‍ക്കാര്‍ നടപടി സ്വീകരിച്ചു വരികയാണ്. കേരളത്തില്‍ വ്യവസായങ്ങള്‍ക്ക് അനുകൂല സാഹചര്യമില്ലെന്ന പ്രതീതി സൃഷ്ടിക്കപ്പെട്ടിട്ടുണ്ട്. എന്നാല്‍ കേരളത്തില്‍ വ്യവസായം നടത്തുന്നവരെല്ലാം തങ്ങള്‍ക്ക് ഇവിടെ ദുരനുഭവം ഉണ്ടായിട്ടില്ലെന്നാണ് പറയുന്നത്. കൊവിഡ് കേരളത്തിന്റെ സാമ്പത്തിക മേഖലയില്‍ പ്രത്യാഘാതം സൃഷ്ടിച്ചിട്ടുണ്ട്. ഇത്തരമൊരു സ്ഥിതിയില്‍ കേന്ദ്ര സര്‍ക്കാരിന്റെ സഹായം പ്രധാനമാണ്. സംസ്ഥാനങ്ങള്‍ സംതൃപ്തമായിരിക്കണം എന്ന ചിന്ത കേന്ദ്രം ചില ഘട്ടങ്ങളില്‍ മറന്നു പോകുന്നതായും മുഖ്യമന്ത്രി പറഞ്ഞു.