ലണ്ടന്‍: യൂറോ യോഗ്യതക്കിറങ്ങുന്ന ഇംഗ്ലണ്ട് ഫുട്‌ബോള്‍ ടീമിനെ വീണ്ടും പരുക്ക് അലട്ടുന്നു. ലിവര്‍പൂളിന്റെ റൈറ്റ് ബാക്ക് അലക്‌സാണ്ടര്‍ അര്‍നോള്‍ഡ് പരുക്ക് കാരണം പിന്‍വാങ്ങിയതിനു പിന്നാലെ മാഞ്ചസ്റ്റര്‍ യുനൈറ്റഡ് താരം റാഷ്‌ഫോര്‍ഡിനും പരുക്കേറ്റിരിക്കുകയാണ്. ഇതോടെ ഇന്ന് ചെക്ക് റിപ്പബ്ലിക്കിനെതിരേയുള്ള മത്സരത്തില്‍ റാഷ്‌ഫോര്‍ഡ് കളിക്കില്ല എന്നുറപ്പായി. പക്ഷെ മോണ്ടെനെഗ്രോയ്ക്ക് എതിരേ റാഷ്‌ഫോര്‍ഡിനെ ഇറക്കാന്‍ കഴിയുമെന്നാണ് മാനേജര്‍ സൗത്‌ഗേറ്റിന്റെ പ്രതീക്ഷ.

റാഷ്‌ഫോര്‍ഡ് ഉള്‍പ്പെടെ ഇതുവരെ ആറു താരങ്ങള്‍ക്കാണ് ഇംഗ്ലീഷ് ക്യാംപില്‍ നിന്ന് പരുക്കേറ്റത്. മാഞ്ചസ്റ്റര്‍ യുനൈറ്റഡ് താരമായ ലൂക് ഷോ, മാഞ്ചസ്റ്റര്‍ സിറ്റി താരമായ ഡെല്‍ഫ്, സ്റ്റോണ്‍സ്, ചെല്‍സി താരമായ ലോഫ്റ്റസ് ചീക് എന്നിവര്‍ നേരത്തെ പരുക്ക് കാരണം ക്യാംപ് വിട്ടിരുന്നു. റാഷ്‌ഫോര്‍ഡിന്റെ അഭാവത്തില്‍ ഡോര്‍ട്മുണ്ട് താരം സാഞ്ചോ ഇന്ന് ആദ്യ ഇലവനില്‍ എത്തും എന്നാണ് കരുതുന്നത്.