ലഖ്‌നോ: ഉത്തര്‍പ്രദേശിലെ ലഖിംപൂരിലെ ബി.ജെ.പി എം.എല്‍.എ യോഗേഷ് വര്‍മയ്ക്ക് ഹോളി ആഘോഷത്തിനിടെ വെടിയേറ്റു. വലതുകാലില്‍ ബുള്ളറ്റ് തുളച്ചുകയറിയ എം.എല്‍.എയെ ഉടന്‍ ആശുപത്രിയിലേക്കു മാറ്റി.

അദ്ദേഹം അപകടനില തരണംചെയ്തതായും എന്നാല്‍ ഇപ്പോള്‍ മൊഴിരേഖപ്പെടുത്താന്‍ കഴിയുന്ന അവസ്ഥയിലില്ലെന്നും ലഖിംപൂര്‍ കലക്ടര്‍ എസ്. സിങ് അറിയിച്ചു.
ലഖിംപൂരിലെ പാര്‍ട്ടി ഓഫിസില്‍വച്ചാണ് ഇന്നലെ എം.എല്‍.എ പ്രവര്‍ത്തകര്‍ക്കൊപ്പം ഹോളി ആഘോഷിച്ചത്. വീട്ടിലേക്കു പുറപ്പെടാനിരുന്ന എം.എല്‍.എയുടെ അടുത്തെത്തിയ തോക്കുധാരി അദ്യം എം.എല്‍.എയുടെ അടുത്തുനിന്ന് അനുഗ്രഹം വാങ്ങുകയും പിന്നീട് വെടിവയ്ക്കുകയുമായിരുന്നുവെന്ന് ദൃക്‌സാക്ഷികള്‍ പറഞ്ഞു.