നാദാപുരം: ഇന്ന് ലോക ക്ഷീരദിനം. ഐക്യരാഷ്ട്രസഭയുടെ കീഴിലുള്ള ഭക്ഷ്യ കാര്‍ഷിക സംഘടനയുടെ ആഹ്വാന പ്രകാരം 2001 മുതലാണ് എല്ലാ വര്‍ഷവും ജൂണ്‍ ഒന്നാം തീയതി ലോക ക്ഷീരദിനമായി കൊണ്ടാടാന്‍ ആരംഭിച്ചത്. പാലിനെ ആഗോള ഭക്ഷണമായി കണ്ട് അതിന്റെ പ്രാധാന്യം മനസിലാക്കുക എന്നതാണ് ദിനാചരണത്തിന്റെ ലക്ഷ്യം. ക്ഷീരോല്‍പാദന മേഖലയിലെ വിവിധ പ്രവര്‍ത്തനങ്ങളെക്കുറിച്ച് അവബോധം സൃഷ്ടിക്കാനും ഈ ദിനം ഉപയോഗപ്പെടുത്തുന്നു.
കേരളത്തില്‍ വിവിധ പരിപാടികളോടെ ക്ഷീരദിനം ആചരിക്കും. ക്ഷീര ദിനവുമായി ബന്ധപ്പെട്ട് രാവിലെ ഒന്‍പത് മണിക്ക് മൃഗസംരക്ഷണ മന്ത്രി കെ.രാജു ഫെയ്‌സ്ബുക്ക് പേജിലൂടെ ക്ഷീരകര്‍ഷകരുമായി സംവദിക്കും. തുടര്‍ന്ന് ജില്ലയിലെ ക്ഷീരസഹകരണ സംഘങ്ങളില്‍ പതാക ഉയര്‍ത്തല്‍, ഫലവൃക്ഷത്തൈ നടീല്‍ എന്നിവയും സംഘടിപ്പിക്കും.