പൈനാവ്: കലക്ടറേറ്റ് കോംപൗണ്ടില്‍നിന്ന് കളഞ്ഞുകിട്ടിയ പണം വിദ്യാര്‍ഥികള്‍ ആര്‍.ഡി.ഒയെ ഏല്‍പ്പിച്ചു. വഴി സംബന്ധിച്ച ഹിയറിങ്ങിനായി മാതാപിതാക്കളോടും ബന്ധുക്കളോടുമൊപ്പം എത്തിയ അറക്കുളം സ്വദേശികളായ തന്‍ഹ ജമാലുദ്ദീന്‍, സി.എച്ച് ഹിദാമോള്‍, ഷിഫാന സുധീര്‍ എന്നിവര്‍ക്കാണ് കലക്ടറേറ്റ് പരിസരത്തെ പൂന്തോട്ടത്തിനു സമീപത്തുവച്ച് 1,500 രൂപ കളഞ്ഞുകിട്ടിയത്. കുട്ടികള്‍ ഇക്കാര്യം ബന്ധുക്കളോട് പറയുകയും ആര്‍.ഡി.ഒയെ പണം ഏല്‍പ്പിക്കാമെന്ന് തീരുമാനിക്കുകയും ചെയ്തു.
തന്‍ഹ കോളപ്ര ജി.എച്ച്.എസില്‍ ആറാം ക്ലാസിലും ഹിദാമോളും ഷിഫാനയും അറക്കുളം സെന്റ് മേരീസ് സ്‌കൂളില്‍ പത്തിലും ഒന്‍പതിലും പഠിക്കുന്നു. വിദ്യാര്‍ഥികളെ ആര്‍.ഡി.ഒ വിനോദ് അഭിനന്ദിച്ചു. തുടര്‍ നടപടികള്‍ക്കായി പണം കലക്ടറേറ്റ് എച്ച്.എസിനെ ഏല്‍പ്പിക്കുകയും ചെയ്തു.