കൊച്ചി: ഫസല്‍ വധക്കേസുമായി ബന്ധപ്പെട്ട് സി.ബി.ഐ ഓഫിസിലേക്ക് പ്രകോപനപരമായ റാലി നടത്തിയതടക്കമുള്ള നാല് കേസുകളില്‍ എറണാകുളം ചീഫ് ജുഡീഷ്യല്‍ മജിസ്‌ട്രേറ്റ് കോടതി പി. ജയരാജന് ജാമ്യം അനുവദിച്ചു.

തനിക്കെതിരേ ചില വലതുപക്ഷ മാധ്യമങ്ങള്‍ നടത്തുന്ന പ്രചാരണത്തില്‍ വലിയ കാര്യമില്ല. ഇടതുപക്ഷത്തിനെതിരേ എതിരാളികള്‍ ആരോപണം ഉന്നയിക്കുന്നതും അത് വലതു മാധ്യമങ്ങള്‍ പ്രോത്സാഹിപ്പിക്കുന്നതും പുതിയ സംഭവമല്ല. താന്‍ മത്സരിക്കുന്നത് ഏതെങ്കിലും ഒരു സ്ഥാനാര്‍ഥിക്കെതിരെയല്ലെന്നും അദ്ദേഹം ആവര്‍ത്തിച്ചു.

വടകരയില്‍ ആര്‍.എം.പിയെ ബി.ജെ.പിയിലേക്കുള്ള പാലം സൃഷ്ടിക്കാനുള്ള ഉപകരണമാക്കി കോണ്‍ഗ്രസും മുസ്ലിം ലീഗും മാറ്റിയെന്ന് അദ്ദേഹം പറഞ്ഞു.
ആര്‍.എം.പി ഇപ്പോള്‍ കോണ്‍ഗ്രസിന്റെ വാലായി മാറി. കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനാണ് ഇതിന്റെ സൂത്രധാരന്‍. എന്നാല്‍ ജനങ്ങള്‍ ഇത് തിരിച്ചറിഞ്ഞുകഴിഞ്ഞെന്നും ജയരാജന്‍ പറഞ്ഞു.

ഇപ്പോഴത്തെ കോ-ലീ-ബി സഖ്യം പോലെ എന്ത് അവിശുദ്ധ കൂട്ടുകെട്ട് ഉണ്ടാക്കിയാലും എല്‍.ഡി.എഫ് വലിയ വിജയം നേടും. കന്നി വോട്ടര്‍മാര്‍ ആവേശത്തോടെയാണ് പ്രവര്‍ത്തനത്തിന് ഇറങ്ങുന്നത്.