കിളിമാനൂര്‍: നാലുപേരടങ്ങുന്ന സംഘം കടയില്‍ അതിക്രമിച്ചു കയറി യുവാവിനെ കൊലപ്പെടുത്താന്‍ ശ്രമം. തലയ്ക്കും ശരീരത്തിലും പരുക്കേറ്റ യുവാവിനെ ആശുപത്രിയില്‍ പ്രവേശിപ്പിച്ചു. ആലംകോട് വഞ്ചിയൂര്‍, പട്ട്‌ള, എസ്.ആര്‍ മന്ദിരത്തില്‍ മിലന്‍ ജിത്തി (38) നാണ് പരുക്കേറ്റത്.
സംഭവത്തില്‍ ആറ്റിങ്ങല്‍ പൊലിസ് കേസെടുത്ത് അന്വേഷണം ആരംഭിച്ചു. വ്യാഴാഴ്ച ഉച്ചയ്ക്കു ശേഷമാണ് സംഭവം. വഞ്ചിയൂര്‍ ഗവ. യു.പി സ്‌കൂളിന് എതിര്‍വശത്തായി സ്റ്റേഷനറി കട നടത്തുകയാണ് യുവാവ്. നാലു പേരടങ്ങുന്ന സംഘം കടയിലെത്തുകയും കടയിലിരുന്ന് മദ്യപിക്കാന്‍ അനുവദിക്കണമെന്ന് ആവശ്യപ്പെടുകയും ചെയ്തു.
വിസമ്മതിച്ച യുവാവിനെ കൈയില്‍ കരുതിയിരുന്ന കമ്പിപ്പാര അടക്കമുള്ള മാരകായുധങ്ങളുമായി ആക്രമിക്കുകയായിരുന്നുവെന്ന് പൊലിസിന് നല്‍കിയ മൊഴിയില്‍ പറയുന്നു. തലയ്ക്കാണ് പരുക്കേറ്റത്. ബഹളം കേട്ട് സമീപത്തെ വ്യാപാരികള്‍ എത്തിയപ്പോള്‍ അക്രമികള്‍ കാറില്‍ കയറി രക്ഷപ്പെട്ടു.
തലയ്ക്കു മുറിവേറ്റ മിലന്‍ ജിത്തിനെ കേശവപുരം ഗവ. ആശുപത്രിയില്‍ പ്രാഥമിക ചികിത്സ നല്‍കിയ ശേഷം തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഫോര്‍ രജിസ്‌ടേഡ് ബോര്‍ഡ് പതിച്ച വാഗണര്‍ കാറിലാണ് സംഘമെത്തിയത്. കാര്‍ നഗരൂര്‍ ഭാഗത്തേക്കാണ് ഓടിച്ചു പോയത്.