കോഴിക്കോട്: കരാര്‍ ജീവനക്കാര്‍ക്ക് പ്രസവാവധി നിഷേധിക്കരുതെന്ന് മനുഷ്യാവകാശ കമ്മിഷന്‍ ഉത്തരവ്. കോഴിക്കോട് തദ്ദേശ സ്വയംഭരണ വകുപ്പിന് കീഴില്‍ പ്രവര്‍ത്തിക്കുന്ന ഇന്‍ഫര്‍മേഷന്‍ കേരള മിഷനില്‍ കരാര്‍ അടിസ്ഥാനത്തില്‍ നിയമിതരായ ജീവനക്കാര്‍ സമര്‍പ്പിച്ച പരാതിയിലാണ് കമ്മിഷന്‍ നടപടി. സര്‍ക്കാരിതര തൊഴിലിടങ്ങളില്‍ ജോലി ചെയ്യുന്ന സ്ത്രീകള്‍ക്കും 180 ദിവസത്തെ പ്രസവാവധിക്ക് അര്‍ഹതയുണ്ടെന്ന് ഹൈക്കോടതി വിധിച്ചിരുന്നു. കരാര്‍ ജീവനക്കാര്‍ എന്ന പേരില്‍ പ്രസവാവധി നിഷേധിക്കാന്‍ ഒരിക്കലും കഴിയില്ലെന്നും കമ്മിഷന്‍ ചൂണ്ടിക്കാണിച്ചു.
ഇന്‍ഫര്‍മേഷന്‍ കേരള മിഷനില്‍ കരാര്‍ അടിസ്ഥാനത്തില്‍ നിയമിതരായ രണ്ട് പേരാണ് പരാതി നല്‍കിയത്. 2016 ഡിസംബര്‍ 20 ന് തദ്ദേശ സ്വയംഭരണ വകുപ്പു മന്ത്രിയുടെ അധ്യക്ഷതയില്‍ ചേര്‍ന്ന ഐ.കെ.എമ്മിന്റെ യോഗം കരാര്‍ ജീവനക്കാര്‍ക്കും പ്രസവാവധി അനുവദിക്കാന്‍ തീരുമാനിച്ചിരുന്നു. ഇതിന്റെ അടിസ്ഥാനത്തില്‍ മെഡിക്കല്‍ സര്‍ട്ടിഫിക്കറ്റുമായി പ്രസവാവധിക്ക് അപേക്ഷ നല്‍കിയെന്നും എന്നാല്‍ സാങ്കേതിക കാരണങ്ങള്‍ ചൂണ്ടിക്കാണിച്ച് അവധി നിഷേധിക്കുകയായിരുന്നുവെന്നാണ് പരാതിയില്‍ പറയുന്നത്.
പരാതിയുടെ അടിസ്ഥാനത്തില്‍ സ്ഥാപനത്തിലെ ഭരണവിഭാഗം മേധാവി ഇത് സംബന്ധിച്ച് സര്‍ക്കാരുമായി ആശയ വിനിമയം നടത്തി ആവശ്യക്കാര്‍ക്ക് പ്രസവാവധി അടിയന്തിരമായി അനുവദിക്കണമെന്ന് കമ്മിഷന്‍ ജുഡീഷ്യല്‍ അംഗം പി. മോഹനദാസ് ഉത്തരവില്‍ പറഞ്ഞു. ഇറക്കിയ ഉത്തരവ് നടപ്പിലാക്കിയ ശേഷം രണ്ടുമാസത്തിനകം ഐ.കെ.എം നടപടി റിപ്പോര്‍ട്ട് ഫയല്‍ ചെയ്യണമെന്നും കമ്മിഷന്‍ ആവശ്യപ്പെട്ടു.