മലപ്പുറം: സ്‌കോള്‍ കേരള മുഖേന 2018-20 ബാച്ചിലേക്കുള്ള ഹയര്‍സെക്കന്‍ഡറി ഒന്നാംവര്‍ഷ പ്രവേശനം ആരംഭിച്ചു. എസ്.എസ്.എല്‍.സി അല്ലെങ്കില്‍ അംഗീകൃത തത്തുല്യ യോഗ്യതയുള്ളവര്‍ക്കു ജൂലൈ 31വരെ പിഴയില്ലാതെയും 60 രൂപ പിഴയോടെ ഓഗസ്റ്റ് 10വരെയും ഫീസടച്ച് ംംം.രെീഹലസലൃമഹമ.ീൃഴ എന്ന വെബ്‌സൈറ്റില്‍ ഓണ്‍ലൈനായി രജിസ്റ്റര്‍ ചെയ്യാം. പ്രവേശനത്തിന് ഉയര്‍ന്ന പ്രായപരിധിയില്ല.
ഓപ്പണ്‍ റെഗുലര്‍ വിഭാഗത്തില്‍ സയന്‍സ് ഉള്‍പ്പെടെ പ്രാക്ടിക്കലുള്ള വിഷയങ്ങളില്‍ തെരഞ്ഞെടുത്ത കോമ്പിനേഷനുകളില്‍ രജിസ്റ്റര്‍ ചെയ്യാം. സര്‍ക്കാര്‍ ഹയര്‍സെക്കന്‍ഡറി സ്‌കൂളുകളാണ് പഠനകേന്ദ്രങ്ങളായി അനുവദിക്കുന്നത്. സ്വയം പഠനസഹായികളും ലാബ് സൗകര്യവും പൊതു അവധി ദിവസങ്ങളില്‍ സമ്പര്‍ക്ക ക്ലാസും ഈ വിഭാഗം വിദ്യാര്‍ഥികള്‍ക്കു ലഭിക്കും.
ഹ്യൂമാനിറ്റീസ്, കൊമേഴ്‌സ് വിഭാഗങ്ങളില്‍ തെരഞ്ഞെടുത്ത കോമ്പിനേഷനുകളില്‍ പ്രാക്ടിക്കല്‍ ഇല്ലാത്ത വിഷയങ്ങളില്‍ മാത്രമാണ് പ്രൈവറ്റ് രജിസ്‌ട്രേഷനു സൗകര്യമുള്ളത്.
ഓണ്‍ലൈന്‍ രജിസ്‌ട്രേഷന്‍ അപേക്ഷയോടൊപ്പം ജനറേറ്റ് ചെയ്തു ലഭ്യമാകുന്ന ബാര്‍കോഡ്, ചലാന്‍ നമ്പര്‍ സഹിതമുള്ള ചലാന്‍ ഉപയോഗിച്ച് സംസ്ഥാനത്തെ ഏതു പോസ്റ്റ് ഓഫിസിലും ഫീസ് അടയ്ക്കാം.
നിര്‍ദിഷ്ട രേഖകള്‍ സഹിതം അതാത് ജില്ലാ കേന്ദ്രങ്ങളില്‍ നേരിട്ടും എക്‌സിക്യൂട്ടീവ് ഡയരക്ടര്‍, സ്‌കോള്‍ കേരള, വിദ്യാഭവന്‍, പൂജപ്പുര, തിരുവനന്തപുരം-12 എന്ന വിലാസത്തില്‍ നേരിട്ടോ സ്പീഡ്, രജിസ്‌ട്രേഡ് തപാല്‍ വഴിയോ അപേക്ഷ സമര്‍പിക്കാം. ഫോണ്‍: 0483 2734295, 0471 2342950, 2342271, 2342369.