കൊല്‍ക്കത്ത: സ്വന്തം തട്ടകത്തിലെ രണ്ടാം പോരാട്ടത്തിലും വിജയം സ്വന്തമാക്കി കൊല്‍ക്കത്ത നൈറ്റ്‌റൈഡേഴ്‌സ് ഐ.പി.എല്‍ പോയിന്റ് പട്ടികയില്‍ ഒന്നാം സ്ഥാനത്തെത്തി. സണ്‍റൈസേഴ്‌സ് ഹൈദരാബാദിനെ 17 റണ്‍സിന് കീഴടക്കിയാണ് നാല് മത്സരങ്ങളില്‍ കൊല്‍ക്കത്ത മൂന്നാം വിജയം നേടിയത്.
ആദ്യം ബാറ്റു ചെയ്ത കൊല്‍ക്കത്ത നിശ്ചിത 20 ഓവറില്‍ ആറ് വിക്കറ്റ് നഷ്ടത്തില്‍ 172 റണ്‍സെടുത്തപ്പോള്‍ ഹൈദരാബാദിന്റെ പോരാട്ടം 20 ഓവറില്‍ ആറ് വിക്കറ്റ് നഷ്ടത്തില്‍ 155 റണ്‍സില്‍ അവസാനിച്ചു. നായകന്‍ വാര്‍ണര്‍, യുവരാജ് സിങ് എന്നിവര്‍ 26 റണ്‍സ് വീതമെടുത്ത് ടോപ് സ്‌കോറര്‍മാരായി.
16 പന്തില്‍ രണ്ടു വീതം ഫോറും സിക്‌സും പറത്തി മികച്ച ബാറ്റിങ് പുറത്തെടുത്ത യുവിക്ക് അധികം ക്രീസില്‍ നില്‍ക്കാന്‍ സാധിച്ചില്ല. കൊല്‍ക്കത്തക്കായി ക്രിസ് വോക്‌സ് രണ്ടും നരെയ്ന്‍, ബോള്‍ട്ട്, കുല്‍ദീപ് യാദവ്, യൂസുഫ് പത്താന്‍ എന്നിവര്‍ ഓരോ വിക്കറ്റും വീഴ്ത്തി.
നേരത്തെ ടോസ് നേടി ഹൈദരാബാദ് കൊല്‍ക്കത്തയെ ബാറ്റിങിനയക്കുകയായിരുന്നു. ഓപണറായി എത്തിയ നരെയ്‌നും നായകന്‍ ഗംഭീറും ഇത്തവണ അധികം പിടിച്ചു നിന്നില്ല. എന്നാല്‍ മൂന്നാമനായി ക്രീസിലെത്തിയ റോബിന്‍ ഉത്തപ്പ 39 പന്തില്‍ അഞ്ചു ഫോറും നാലു സിക്‌സും പറത്തി 68 റണ്‍സും മനീഷ് പാണ്ഡെ മൂന്നു ഫോറും രണ്ടു സിക്‌സുമടക്കം 46ഉം റണ്‍സെടുത്ത് കൊല്‍ക്കത്തയെ പൊരുതാവുന്ന സ്‌കോറിലെത്തിച്ചു.
യൂസുഫ് പത്താന്‍ പുറത്താകാതെ 21 റണ്‍സെടുത്തു. ഹൈദരാബാദിനായി ഭുവനേശ്വര്‍ കുമാര്‍ മൂന്ന് വിക്കറ്റുകള്‍ പിഴുതു. ഉത്തപ്പയാണ് കളിയിലെ താരം.