കല്‍പ്പറ്റ: തെരഞ്ഞെടുപ്പ് കാലത്ത് വീണതും വീണുകിട്ടുന്നതും വിദ്യയാണ്. ഇത് പ്രചാരണ വിഭവങ്ങളായി മണ്ഡലങ്ങളില്‍ തെരഞ്ഞെടുപ്പ് ദിവസംവരെ ഒളിഞ്ഞും തെളിഞ്ഞും അലയടിച്ചുകൊണ്ടിരിക്കും.
പതിനേഴാം ലോക്‌സഭാ തെരഞ്ഞെടുപ്പിനൊരുങ്ങുന്ന വയനാട്ടില്‍ ഇത്തവണ വിഭവങ്ങള്‍ക്ക് കുറവൊന്നുമില്ല. മണ്ഡല രൂപീകരണത്തിന് മുന്‍പ് മുതലുള്ള വയനാടിന്റെ വികസന സ്വപ്‌നങ്ങള്‍ ഇന്നും പകല്‍ക്കിനാവുകളാണ്. ഈ സ്വപ്‌നങ്ങള്‍ക്കൊപ്പം നേതാക്കളുടെ വാ വിട്ടതും വീണുകിട്ടിയതും ഇരുമുന്നണികളും സജീവ പ്രചാരണ വിഷയങ്ങളാക്കിയിട്ടുമുണ്ട്. കോണ്‍ഗ്രസ് നേതാക്കളായ അജയ് തറയിലിന്റെ 'കുറ്റിച്ചൂല് ', രാജ്‌മോഹന്‍ ഉണ്ണിത്താന്റെ 'വല്ലപ്പോഴും സാന്നിധ്യമറിയിച്ചാല്‍ മതി' തുടങ്ങിയ നാക്കുപിഴകള്‍ ഇതിനകം വയനാട്ടില്‍ ഇടതുമുന്നണിയും പോഷക സംഘടനകളും ഇപ്പോഴും എപ്പോഴും സമൂഹമാധ്യമങ്ങളിലും പ്രസംഗ വേദികളിലും 'ലൈവായി' കൊഴുപ്പിക്കുന്നുണ്ട്.
ഏറ്റവും ഒടുവില്‍ ഇക്കഴിഞ്ഞ വ്യാഴാഴ്ച ബാങ്ക് ഓഫ് ഇന്ത്യ കല്‍പ്പറ്റ ബ്രാഞ്ചിലെ കര്‍ഷകന്റെ വീട് ജപ്തിയാണ് യു.ഡി.എഫിന് വീണുകിട്ടിയ കടാക്ഷം. സ്ഥാനാര്‍ഥി തീരുമാനം വൈകിയതിനെ തുടര്‍ന്ന് (ഇനിയും എ.ഐ.സി.സി പ്രഖ്യാപനമുണ്ടായിട്ടില്ല) ഇന്നലെ മുതല്‍ തുടങ്ങിയ യു.ഡി.എഫ് പ്രചാരണ വേദികളില്‍ 'ജപ്തി' മയമാകുമെന്നതില്‍ തര്‍ക്കമില്ല.
ചാനല്‍ ചര്‍ച്ചകള്‍ക്കിടെ കെ.സി വേണുഗോപാലിന്റെ വയനാട് മണ്ഡലത്തിലെ സ്ഥാനാര്‍ഥിത്വത്തെ സംബന്ധിച്ച് പറയുമ്പോഴായിരുന്നു രാജ്‌മോഹന്‍ ഉണ്ണിത്താന്റെ വിവാദ പരാമര്‍ശം.
പാര്‍ട്ടിയില്‍ നിരവധി ചുമതലകളുള്ള കെ.സിക്ക് അനുയോജ്യമാണ് വയനാടെന്നും സോണിയാ ഗാന്ധിയും രാഹുല്‍ ഗാന്ധിയും അവരുടെ മണ്ഡലങ്ങളില്‍ വല്ലപ്പോഴും സാന്നിധ്യമറിയിക്കുന്നതുപോലെ മതിയാകും വയനാട്ടിലെന്നുമായിരുന്നു പരാമര്‍ശം. വല്ലപ്പോഴും എന്നത് കൊണ്ട് നേതാവ് ഉദ്ദേശിച്ചത് തെരഞ്ഞെടുപ്പ് പ്രചാരണ സമയമാണെങ്കിലും ആവശ്യക്കാര്‍ അത് വേണ്ടതുപോലെ ഇപ്പോഴും ഉപയോഗിക്കുന്നു. ഇതിന്റെ ക്ഷീണം തീരുന്നതിന് മുന്‍പാണ് കോണ്‍ഗ്രസ് വക്താവ് അജയ് തറയിലിന്റെ 'കുറ്റിച്ചൂല്‍' പ്രയോഗം. വയനാട്ടില്‍ കോണ്‍ഗ്രസ് കുറ്റിച്ചൂലിനെ സ്ഥാനാര്‍ഥിയാക്കിയാലും വിജയിക്കുമെന്നാണ് വക്താവ് ചാനല്‍ ചര്‍ച്ചക്കിടെ പ്രയോഗിച്ചത്. പ്രസ്താവനകള്‍ക്കെതിരേ പ്രവര്‍ത്തകര്‍ തന്നെ രഹസ്യമായി രംഗത്തെത്തിയിരുന്നു.
ജില്ലയിലെ വോട്ടര്‍മാരെ അവഹേളിക്കുന്ന പ്രസ്താവനകള്‍ ചിലപ്പോള്‍ ചില സമ്മര്‍ദങ്ങള്‍ കാരണം തിരുത്തപ്പെട്ടേക്കാം. എന്നാല്‍ സംസ്ഥാന സര്‍ക്കാരിന്റെ മൊറട്ടോറിയവും വീണുകിട്ടിയ ബാങ്കിന്റെ ജപ്തിയും കുടിയേറ്റ കര്‍ഷകര്‍ ഏറെയുള്ള വയനാട് മണ്ഡലത്തില്‍ സജീവ ചര്‍ച്ചയാകും.