സിംഗപൂര്‍: ഇന്ത്യന്‍ താരങ്ങളായ കിഡംബി ശ്രീകാന്തും ബി സായ് പ്രണീതും സിംഗപൂര്‍ ഓപണ്‍ സൂപ്പര്‍ സീരീസ് ബാഡ്മിന്റണിന്റെ പുരുഷ സിംഗിള്‍സ് ഫൈനലില്‍ ഏറ്റുമുട്ടും. ഇന്തോനേഷ്യയുടെ ആന്റണി ജിന്‍ഡിങിനെ പരാജയപ്പെടുത്തിയാണ് ശ്രീകാന്ത് ഫൈനലിലെത്തിയത്.
കൊറിയയുടെ ലീ ഡോങ് കെനിനെ വീഴ്ത്തിയാണ് സായ് പ്രണീത് കന്നി സൂപ്പര്‍ സീരീസ് ഫൈനലിലേക്ക് യോഗ്യത സ്വന്തമാക്കിയത്. ഇതോടെ ഫൈനലില്‍ ഇന്ത്യന്‍ പോരാട്ടത്തിനാണ് കളമൊരുങ്ങിയത്.
മത്സരത്തിലുടനീളം സര്‍വാധിപത്യം പുലര്‍ത്തിയാണ് സെമിയില്‍ ശ്രീകാന്ത് വിജയിച്ചത്. നേരിട്ടുള്ള സെറ്റുകള്‍ക്ക് 21-13, 21-14 എന്ന സ്‌കോറിനായിരുന്നു ശ്രീകാന്തിന്റെ വിജയം.
രണ്ടാം സെമിയില്‍ നേരിട്ടുള്ള സെറ്റുകള്‍ക്ക് കൊറിയന്‍ താരമായ ലീ ഡോങ് കെനിനെ പരാജയപ്പെടുത്തിയാണ് സായ് പ്രണീത് ഫൈനലിലിടം കണ്ടത്.
കരിയറില്‍ ആദ്യമായാണ് സായ് സൂപ്പര്‍ സീരീസ് പോരാട്ടത്തിന്റെ കലാശപ്പോര് കളിക്കാനൊരുങ്ങുന്നത്. മൂന്ന് തവണ കൊറിയ മാസ്റ്റേഴ്‌സ് ഗ്രാന്‍ പ്രീ കിരീടം സ്വന്തമാക്കിയ ലീ ഡോങിനെ 21-6, 21-8 എന്ന സ്‌കോറിന് അനായാസം മറികടക്കാന്‍ ഇന്ത്യന്‍ താരത്തിന് സാധിച്ചു.