കോട്ടയം: ശത്രുവര്‍ഗത്തെ ഇടതുപക്ഷം ഒറ്റക്കെട്ടായി നേരിടണമെന്ന സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ പ്രസ്താവന സ്വാഗതം ചെയ്യുന്നതായി സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. മുന്നണിയെ നന്നാക്കുകയെന്ന ലക്ഷ്യത്തോടെയാണ് ചില കാര്യങ്ങള്‍ പറയേണ്ടി വന്നതെന്നും സര്‍ക്കാരിനെ ശക്തിപ്പെടുത്താനാണ് സി.പി.ഐ അന്നും ഇന്നും ശ്രമിച്ചതെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു. പ്രതിപക്ഷത്തിന് ആയുധമാക്കാന്‍ കഴിയുന്ന വാക്കോ പ്രവൃത്തിയോ സി.പി.ഐയില്‍ നിന്നുണ്ടായിട്ടില്ല. പ്രതിപക്ഷത്തിന് ആയുധം നല്‍കരുതെന്ന നിലപാട് തന്നെയാണ് പാര്‍ട്ടിക്കുള്ളത്.
നിലമ്പൂര്‍ മാവോയിസ്റ്റ് ഏറ്റുമുട്ടലുമായി ബന്ധപ്പെട്ട് കോടിയേരി പറഞ്ഞത് സി.പി.എമ്മിന്റെയും താന്‍ പറഞ്ഞത് സി.പി.ഐയുടെയും നിലപാടാണ്. അഭിപ്രായ വ്യത്യാസങ്ങളില്‍ ചര്‍ച്ചയ്ക്ക് സി.പി.ഐ തയാറാണ്. ചര്‍ച്ച നടത്താമെന്ന കോടിയേരിയുടെ നിര്‍ദേശത്തെയും സ്വാഗതം ചെയ്യുന്നു. സി.പി.ഐക്ക് ഇരുമുന്നണികളിലും ഭരണം നടത്തിയ പരിചയമുണ്ടെന്ന കോടിയേരിയുടെ വാക്കുകള്‍ക്ക് പലര്‍ക്കും മറ്റുള്ളവരുമായി ചേര്‍ന്നു സമരം ചെയ്തതിന്റെയൊക്കെ ഓര്‍മകളുണ്ടാകുമെന്നും കാനം തിരിച്ചടിച്ചു.
മുഖ്യമന്ത്രി പിണറായി വിജയന് മുതലാളിയുടെ മുഖമാണെന്ന് പറഞ്ഞിട്ടില്ല. ട്രേഡ് യൂനിയനുമായി ബന്ധപ്പെട്ട് ചില പ്രശ്‌നങ്ങളുണ്ടാകുമ്പോള്‍ ചില കാര്യങ്ങള്‍ പറയേണ്ടിവരും. അത് ഇനിയും പറയും. പ്രായം കൂടിയ പാര്‍ട്ടിയെന്ന നിലയിലാണ് സി.പി.ഐയെ കോടിയേരി വല്യേട്ടന്‍ എന്നു വിശേഷിപ്പിച്ചതെങ്കില്‍ അതു ശരിയാണ്. മൂന്നാറില്‍ കൈയേറ്റം ഒഴിപ്പിക്കല്‍ നടപടിയുമായി മുന്നോട്ട് പോകുമെന്നും കാനം കൂട്ടിച്ചേര്‍ത്തു.