മലപ്പുറം: ഡിഫ്തീരിയ ഭീതി നിലനില്‍ക്കുന്ന ജില്ലയില്‍ ഇന്നലെ ഒരാള്‍ക്കുകൂടി രോഗം സ്ഥിരീകരിച്ചു. വളവന്നൂര്‍ ആരോഗ്യ ബ്ലോക്കില്‍പ്പെട്ട നാലര വയസുകാരനാണ് ഡിഫ്തീരയ രോഗം സ്ഥിരീകരിച്ചത്. ഇതോടെ ജില്ലയിലെ സ്ഥിരീകരിക്കപ്പെട്ട ഡിഫ്തീരിയ കേസുകളുടെ എണ്ണം ഏഴായി. ഇന്നലെ മാത്രം ഏഴ് പുതിയ ഡിഫ്തീരിയ കേസുകളാണ് ജില്ലയില്‍ റിപ്പോര്‍ട്ട് ചെയ്തത്. ഇതോടെ ഡിഫ്തീരിയ രോഗ ലക്ഷണങ്ങളോടെ കോഴിക്കോട് മെഡിക്കല്‍ കോളജില്‍ ചികിത്സ തേടിയവരുടെ എണ്ണം 38 ആയി. കൊണ്ടോട്ടി ആരോഗ്യ ബ്ലോക്കില്‍ മാത്രം ഇന്നലെ അഞ്ചു കേസുകള്‍ റിപ്പോര്‍ട്ട് ചെയ്തു. ഇതുകൂടാതെ വളന്നൂര്‍, പാണ്ടിക്കാട് ആരോഗ്യ ബ്ലോക്കുകളില്‍ ഒരോ കേസുകളും റിപ്പോര്‍ട്ട് ചെയ്തിട്ടുണ്ട്. ഇന്നലെ റിപ്പോര്‍ട്ട് ചെയ്ത ഡിഫ്തീരിയ കേസുകളില്‍ രണ്ടു പേര്‍ ഒഴികെ ബാക്കിയുള്ളവരെല്ലാം 15 വയസില്‍ താഴെയുള്ളവരാണ്. രോഗ ലക്ഷണം കണ്ട ഒരാള്‍ക്ക് ഇരുപതും മറ്റൊരാള്‍ക്ക് 23 ഉം വയസുണ്ട്.
അതേസമയം കൂടുതല്‍ ഡിഫ്തീരിയ കേസുകള്‍ ജില്ലയില്‍ റിപ്പോര്‍ട്ട് ചെയ്തിട്ടും പ്രതിരോധ പ്രവര്‍ത്തനങ്ങള്‍ക്കാവശ്യമായ ടി.ഡി വാക്‌സിനുകള്‍ ഇന്നലെയും ജില്ലയിലെത്തിയില്ല. സ്‌കൂളുകള്‍ കേന്ദ്രീകരിച്ചും ഡിഫ്തീരിയ കൂടുതല്‍ റിപ്പോര്‍ട്ട് ചെയ്യുന്ന മേഖലകള്‍ കേന്ദ്രീകരിച്ചും ഊര്‍ജിത കുത്തിവെപ്പ് നടത്താനുള്ള ആരോഗ്യ വകുപ്പിന്റെ പദ്ധതി ഉതുമൂലം ഇതുവരെ തുടങ്ങാനായിട്ടില്ല.