കാഠ്മണ്ഡു: നേപ്പാളിനെ പരാജയപ്പെടുത്തി ഇന്ത്യ സാഫ് കപ്പ് വനിതാഫുട്‌ബോളില്‍ ചാംപ്യന്‍മാരായി. ഇന്നലെ നടന്ന ഫൈനല്‍ മത്സരത്തില്‍ നേപ്പാളിനെ 3-1 പരാജയപ്പെടുത്തിയായിരുന്നു ഇന്ത്യ കിരീടം സ്വന്തമാക്കിയത്.
തുടര്‍ച്ചയായി അഞ്ചാം തവണയാണ് ഇന്ത്യന്‍ വനിതകള്‍ സാഫ് കപ്പ് കിരീടം സ്വന്തമാക്കുന്നത്. ടൂര്‍ണമെന്റിലുടനീളം മികച്ച പ്രകടനം പുറത്തെടുത്ത ഇന്ത്യയുടെത് അര്‍ഹിച്ച ജയമായിരുന്നു. ഇന്ത്യക്ക് വേ@ി ഡാലിമ ചിബര്‍, ഡാംങ്ങ്‌മെയി ഗ്രെസ്, അഞ്ജു തമാങ് എന്നിവര്‍ ഗോള്‍ നേടിയപ്പോള്‍ സാബിത്ര ഭണ്ടാരിയാണ് നേപ്പാളിന്റെ ആശ്വാസ ഗോള്‍ നേടിയത്.
ഡാലിമ ചിബറിന്റെ തകര്‍പ്പന്‍ ഫ്രീകിക്കിലൂടെ ഇരുപത്തിയാറാം മിനുട്ടിലാണ് ഇന്ത്യ ആദ്യ ഗോള്‍ സ്വന്തമാക്കിയത്. പ്രതിരോധത്തിലെ പാളിച്ചകള്‍ മുതലെടുത്ത സാബിത്ര ഭണ്ടാരിയിലൂടെ നേപ്പാള്‍ ഗോള്‍ മടക്കി. ഇതോടെ മത്സരം ആവേശത്തിലായി. നേപ്പാളിന് ഗാലറി സപ്പോര്‍ട്ട് കൂടി കിട്ടിയതോടെ ഇന്ത്യക്ക് മേല്‍ അവര്‍ മാനസിക മുന്‍തൂക്കം നേടി. ഇരുടീമുകളും പിന്നീട് പൊരുതിക്കളിച്ചു. ആദ്യ പകുതിയില്‍ സമനിലയുമായി ഇരു ടീമുകളും പിരിഞ്ഞു. സാഫ് ടൂര്‍ണമെന്റില്‍ മെയ്‌മോള്‍ റോകി പരിശീലിപ്പിക്കുന്ന ഇന്ത്യന്‍ ടീം വഴങ്ങിയ ആദ്യ ഗോളാണത്. ഗ്രൂപ്പ് ഘട്ടങ്ങളിലും സെമിയിലും ഇന്ത്യ ഒറ്റ ഗോള്‍ വഴങ്ങാതെയായിരുന്നു മുന്നേറിയത്. ഡാംങ്ങ്‌മെയി ഗ്രെസ്, അഞ്ജു തമാങ് എന്നിവര്‍ നേപ്പാളിന്റെ പ്രതിരോധത്തെ തകര്‍ത്ത് ഗോള്‍ കണ്ടെത്തിയതോടെ ഇന്ത്യ ജയം ഉറപ്പിച്ചു.
ബംഗ്ലാദേശിനെ എതിരില്ലാത്ത നാലു ഗോളുകള്‍ക്ക് തകര്‍ത്തായിരുന്നു ഇന്ത്യയുടെ ഫൈനല്‍ പ്രവേശം. ശ്രീലങ്കയെ പരാജയപ്പെടുത്തി നേപ്പാളും ഫൈനലിലെത്തി. ഇതുവരെ നടന്ന സാഫ് കപ്പിലെല്ലാം ഇന്ത്യയാണ് കിരീടമുയര്‍ത്തിയിട്ടുള്ളത്.