തിരുവനന്തപുരം: കേരളത്തില്‍ തെക്കുപടിഞ്ഞാറന്‍ കാലവര്‍ഷം എത്തിയതായി കേന്ദ്ര കാലാവസ്ഥാ വകുപ്പ്.
രാജ്യത്ത് ഈ വര്‍ഷം സാധാരണയിലും അധികം മഴ ലഭിക്കുമെന്നാണ് വിലയിരുത്തല്‍. ഇന്ന് കോഴിക്കോട് ജില്ലയില്‍ അതിശക്തമായ മഴക്കുള്ള ഓറഞ്ച് അലര്‍ട്ട് നല്‍കിയിട്ടുണ്ട്. കൊല്ലം, എറണാകുളം,ഇടുക്കി, തൃശൂര്‍, മലപ്പുറം,കണ്ണൂര്‍,കാസര്‍കോട് ജില്ലകളില്‍ ശക്തമായ മഴക്കുള്ള യെല്ലോ അലര്‍ട്ടും നല്‍കിയിട്ടുണ്ട്. ജൂണ്‍ മുതല്‍ സെപ്റ്റംബര്‍ വരെ 880 മി.മീ ആണ് സാധാരണ മഴയായി കണക്കാക്കിയിരിക്കുന്നത്. ദക്ഷിണേന്ത്യയില്‍ സാധാരണ മഴയുടെ 102 ശതമാനം ലഭിക്കുമെന്നും കാലാവസ്ഥാ വകുപ്പ് വ്യക്തമാക്കുന്നു. സംസ്ഥാനാടിസ്ഥാനത്തിലുള്ള വിലയിരുത്തല്‍ വന്നിട്ടില്ല. സംസ്ഥാനത്ത് കാലവര്‍ഷം തുടങ്ങിയെന്ന് സ്വകാര്യ ഏജന്‍സികള്‍ കഴിഞ്ഞ ദിവസം തന്നെ വ്യക്തമാക്കിയിരുന്നു. എന്നാല്‍ കേന്ദ്ര കാലാവസ്ഥാ വകുപ്പിന്റെ ഔദ്യോഗിക സ്ഥിരീകരണം ഇന്നലെ ഉച്ചയോടെയാണ് എത്തിയത്. സാധാരണയില്‍ നിന്നു വ്യത്യസ്തമായി ഈ വര്‍ഷം തെക്കന്‍ കേരളം മുതല്‍ വടക്കന്‍ കേരളം വരെ ഒറ്റദിവസം കൊണ്ട് കാലവര്‍ഷം വ്യാപിച്ചതായി കാലാവസ്ഥാ വിദഗ്ധര്‍ പറയുന്നു.
സാധാരണ തെക്കന്‍ കേരളത്തില്‍ എത്തിയതിനു ശേഷം തൊട്ടടുത്ത ദിവസങ്ങളിലാണ് കാലവര്‍ഷം വടക്കന്‍ കേരളത്തിലെത്തുക. അറബിക്കടലില്‍ ചുഴലിക്കാറ്റ് രൂപപ്പെടുന്ന സാഹചര്യം ഇതിന് അനുകൂലമായെന്നാണ് വിലയിരുത്തല്‍.