ന്യൂഡല്‍ഹി: ഡല്‍ഹി ബി.ജെ.പി അധ്യക്ഷന്‍ മനോജ് തിവാരിയുടെ കസേര തെറിച്ചു. നോര്‍ത്ത് ഡല്‍ഹി മുനിസിപ്പല്‍ കോര്‍പറേഷന്‍ മുന്‍മേയര്‍ ആദേശ് കുമാര്‍ ഗുപ്തയ്ക്കാണ് പകരം ചുമതല. ദേശീയ അധ്യക്ഷന്‍ ജെ.പി നദ്ദയുടേതാണ് തീരുമാനം. അടിയന്തര പ്രാധാന്യത്തോടെയുള്ളതാണ് നടപടി.

ഡല്‍ഹി നിയമസഭാ തെരെഞ്ഞെടുപ്പിലെ പരാജയത്തിന് ശേഷം ബി.ജി.പി വീണ്ടും വൈശ്യ സമുദായത്തിന്റെ പിന്തുണയില്‍ കണ്ണുവച്ചാണ് ആദേശ് കുമാറിനെ നേതൃത്വത്തിലേക്ക് പരിഗണിച്ചതെന്നാണ് വിലയിരുത്തല്‍.
ഡല്‍ഹി നിയമസഭാ തെരെഞ്ഞെടുപ്പില്‍ കനത്ത പരാജയം ഏറ്റുവാങ്ങിയതിനെ തുടര്‍ന്ന് മനോജ് തിവാരി കേന്ദ്രനേതൃത്വത്തെ രാജി സന്നദ്ധത അറിയിച്ചിരുന്നു. പകരക്കാരനെ കണ്ടെത്തുന്നതുവരെ തുടരാനായിരുന്നു നിര്‍ദേശം.

എന്നാല്‍ ഇപ്പോഴത്തെ നേതൃമാറ്റം സാധാരണ നീക്കം മാത്രമാണെന്നാണ് പാര്‍ട്ടിയുടെ വിശദീകരണം. ചത്തീസ് ഗഡില്‍ വിഷ്ണു ഡിയൊ സായിയെയും മണിപ്പൂരില്‍ എസ് ദികേന്ദ്ര സിങിനെയും പ്രസിഡന്റുമാരായി നിയമിച്ചതായും പാര്‍ട്ടി വൃത്തങ്ങള്‍ അറിയിച്ചു.