ഗുവാഹത്തി: അസമില്‍ വിവിധയിടങ്ങളിലായുണ്ടായ മണ്ണിടിച്ചിലില്‍ 20ലേറെ പേര്‍ മരിച്ചു. നിരവധി പേര്‍ക്കു പരുക്കേറ്റു. തെക്കന്‍ അസമിലെ ബരക് വാലി മേഖലയിലെ മൂന്നു ജില്ലകളിലായാണ് സംഭവം.
ദിവസങ്ങളായി ഇവിടെ കനത്ത മഴ തുടരുകയാണ്. കച്ചാര്‍, ഹൈലകന്ദി, കരിംഗഞ്ച് ജില്ലകളിലായാണ് മരണങ്ങള്‍ റിപ്പോര്‍ട്ട് ചെയ്യപ്പെട്ടിരിക്കുന്നത്. വിവിധയിടങ്ങളിലായി നിരവധി പേര്‍ക്കു പരുക്കേല്‍ക്കുകയും നിരവധി വീടുകളും കെട്ടിടങ്ങളും തകരുകയും ചെയ്തിട്ടുണ്ട്. ഒരാഴ്ചയോളമായി സംസ്ഥാനം വെള്ളപ്പൊക്കത്തില്‍ പ്രതിസന്ധിയിലാണ്. കൊവിഡ് വ്യാപനത്തിനൊപ്പമാണ് പ്രകൃതിദുരന്തങ്ങളെയും നേരിടേണ്ടിവന്നിരിക്കുന്നത്. രണ്ടു ലക്ഷത്തോളം പേരെ വെള്ളപ്പൊക്ക ദുരിതം ബാധിച്ചതായാണ് കണക്ക്. പതിനായിരത്തോളം പേര്‍ ദുരിതാശ്വാസ ക്യാംപുകളിലാണ് കഴിയുന്നത്. 25,000 ഹെക്ടറിലേറെ കൃഷിയും നശിച്ചിട്ടുണ്ട്.