പൂച്ചാക്കല്‍: പള്ളിപ്പുറം കളത്തില്‍ ക്ഷേത്രത്തിന് സമീപത്ത് റോഡരികില്‍നിന്ന് രണ്ട് ലോഡ് മണല്‍ മോഷ്ടിച്ചതായി പരാതി.
കളത്തില്‍ ക്ഷേത്രം പാറോഴന്‍ കവല റോഡ് പുനര്‍നിര്‍മാണത്തിന്റെ ഭാഗമായി സംരക്ഷണഭിത്തി കെട്ടുന്നതിനായി എടുത്ത് മാറ്റിയ മണ്ണാണ് കഴിഞ്ഞ രാത്രി കടത്തികൊണ്ടുപോയത്.
വിവരമറിഞ്ഞ് ചേന്നംപള്ളിപ്പുറം ഗ്രാമപ്പഞ്ചായത്ത് പൊതുമരാമത്ത് വകുപ്പിനും ചേര്‍ത്തല സി.ഐ.ക്കും പരാതി നല്‍കി. കളത്തില്‍ ക്ഷേത്രത്തിന് സമീപത്തെ സഹകരണബാങ്കില്‍ സ്ഥാപിച്ചിട്ടുള്ള സി.സി.ടി.വി.യില്‍ മണല്‍ കടത്തിയ ലോറിയുടെ ദൃശ്യം പതിഞ്ഞിട്ടുണ്ട്. ഇത് കേന്ദ്രീകരിച്ച് പൊലീസ് അന്വേഷണം ഊര്‍ജിതമാക്കിയിട്ടുണ്ട്.
സംരക്ഷണഭിത്തിക്കായി ആഴത്തില്‍ കുഴിയെടുത്തപ്പോള്‍ സിലിക്കാമണലാണ് ലഭിച്ചത്. ഇത് റോഡരികില്‍ കൂട്ടിയിട്ട് സംരക്ഷണഭിത്തി നിര്‍മിക്കുകയാണ് കരാറുകാര്‍.
നിര്‍മാണം പൂര്‍ത്തീകരിച്ച് കഴിയുമ്പോള്‍ ഇതേ മണ്ണ് വലിച്ചിട്ട് ഇവിടെ നിരപ്പാക്കാനായിരുന്നു പദ്ധതി. എന്നാല്‍ ഗുണമേന്മയേറിയ സിലിക്കാമണല്‍ രാത്രി അജ്ഞാതര്‍ കടത്തുകയായിരുന്നു. സി.സി.ടി.വി.ദൃശ്യങ്ങള്‍ കേന്ദ്രീകരിച്ച് ചേര്‍ത്തല പൊലീസ് അന്വേഷണം തുടങ്ങി.