മൂവാറ്റുപുഴ: നിയോജക മണ്ഡലത്തില്‍ പ്രവര്‍ത്തിക്കുന്ന ആറ് പ്രാഥമിക ആരോഗ്യ കേന്ദ്രങ്ങള്‍ കുടുംബാരോഗ്യ കേന്ദ്രങ്ങളായി ഉയര്‍ത്തിയതായി എല്‍ദോ എബ്രഹാം എം.എല്‍.എ അറിയിച്ചു. നിലവില്‍ കമ്യൂണിറ്റി ഹെല്‍ത്ത് സെന്റര്‍ ആണെങ്കിലും പരിമിതമായ സൗകര്യങ്ങള്‍ മാത്രമുള്ള പ്രാഥമിക ആരോഗ്യ കേന്ദ്രങ്ങളായ കടവൂര്‍, പോത്താനിക്കാട്, മഞ്ഞള്ളൂര്‍, ആവോലി, വാളകം, പാലക്കുഴ എന്നീ ആറ് കേന്ദ്രങ്ങളെയാണ് ആര്‍ദ്രം പദ്ധതിയില്‍ ഉള്‍പ്പെടുത്തി കുടുംബാരോഗ്യ കേന്ദ്രങ്ങളാക്കി ഉയര്‍ത്തിയത്. എറണാകുളം ജില്ലയില്‍ 14 മണ്ഡലങ്ങളിലെ 40 കേന്ദ്രങ്ങളാണ് ആര്‍ദ്രം രണ്ടാം ഘട്ടത്തിന്റെ ഭാഗമായി കുടുംബാരോഗ്യ കേന്ദ്രങ്ങളാക്കി ഉയര്‍ത്തുന്നത്. ഇതില്‍ മൂവാറ്റുപുഴ നിയോജക മണ്ഡലത്തില്‍ ആറ് കേന്ദ്രങ്ങള്‍ ഉള്‍പ്പെടുത്തിയിട്ടുണ്ടെന്നും എം.എല്‍.എ പറഞ്ഞു.
പ്രസ്തുത കേന്ദ്രങ്ങള്‍ കുടുംബാരോഗ്യ കേന്ദ്രങ്ങള്‍ ആക്കി മാറ്റുന്നതോടെ അടിസ്ഥാന സൗകര്യങ്ങളില്‍ വലിയ മാറ്റമാണ് വരുന്നത്. ഒ പി സമയം വൈകിട്ട് ആറ് മണി വരെ ആക്കും. ലാബുകളില്ലാത്ത കേന്ദ്രങ്ങളില്‍ ലാബ് സൗകര്യങ്ങള്‍ ഏര്‍പ്പെടുത്തും. ഗര്‍ഭിണികള്‍ക്കും മറ്റ് രോഗികള്‍ക്കും വിശ്രമിക്കുന്നതിന് പ്രത്യേക റെസ്റ്റിങ്ങ് റൂമുകള്‍, ശ്വാസ ക്ലീനിക്കുകള്‍, ആശ്വാസ ക്ലിനിക്കുകള്‍ തുടങ്ങിയ പദ്ധതികള്‍ കുടുംബാരോഗ്യ കേന്ദ്രത്തിന്റെ ഭാഗമായി ഏര്‍പ്പെടുത്തും. നേരത്തെ പായിപ്ര പ്രാഥമിക ആരോഗ്യ കേന്ദ്രത്തെ കുടുംബാരോഗ്യ കേന്ദ്രമാക്കി ഉയര്‍ത്തിയിരുന്നു. ഇതോടെ നിയോജക മണ്ഡലത്തില്‍ ഏഴ് പ്രാഥമിക ആരോഗ്യ കേന്ദ്രങ്ങള്‍ കുടുംബാരോഗ്യ കേന്ദ്രങ്ങളായി മാറുമെന്ന് എല്‍ദോ എബ്രഹാം എം.എല്‍.എ പറഞ്ഞു.