കോഴിക്കോട്: രാജ്യത്തെ ചരിത്രപ്രാധാന്യമുള്ള പൈതൃക സ്മാരകങ്ങള്‍ സംരക്ഷിക്കാന്‍ സര്‍ക്കാറുകള്‍ വേണ്ടത്ര ശ്രദ്ധിക്കാറില്ലെന്ന് പ്രമുഖ ആര്‍ക്കിയോളജിസ്റ്റും ആര്‍ക്കിയോളജിക്കല്‍ സര്‍വേ ഓഫ് ഇന്ത്യ മുന്‍ റീജ്യനല്‍ ഡയരക്ടറുമായ കെ.കെ മുഹമ്മദ്. കേന്ദ്രത്തില്‍ ബി.ജെ.പി ഭരിച്ചാലും കോണ്‍ഗ്രസ് ഭരിച്ചാലും പൈതൃക സ്മാരകങ്ങളോട് അവഗണനയാണ്.
ആര്‍ക്കിയോളജിക്കല്‍ സര്‍വേ ഓഫ് ഇന്ത്യയിലെ ഉദ്യോഗസ്ഥര്‍ക്ക് നൂറ്റാണ്ടുകള്‍ പഴക്കമുള്ള സ്മാരകങ്ങള്‍ പരിരക്ഷിക്കാന്‍ സര്‍ക്കാരുകളുടെ ഭാഗത്തുനിന്ന് വേണ്ടത്ര പിന്തുണ ലഭിക്കാറില്ലെന്നും മുഹമ്മദ് പറഞ്ഞു. ചാവറ കള്‍ച്ചറല്‍ സെന്ററില്‍ 'ഡല്‍ഹിയിലെ ചരിത്ര സ്മാരകങ്ങള്‍' എന്ന വിഷയത്തില്‍ സംസാരിക്കുകയായിരുന്നു അദ്ദേഹം.
രാഷ്ട്രതലസ്ഥാനമായ ഡല്‍ഹി നൂറ്റാണ്ടുകളായി വിവിധ സംസ്‌കാരങ്ങളുടെ സംഘമഭൂമിയാണ്. ഇതിഹാസമായ മഹാഭാരതത്തില്‍ പറയുന്ന പല സ്ഥലങ്ങളും ഡല്‍ഹിയിലായിരുന്നുവെന്നു പുരാവസ്തു ഗവേഷണത്തിലൂടെ കണ്ടെത്തിയിട്ടുണ്ട്. എന്നാല്‍ പുരാവസ്തു ഗവേഷകര്‍ കണ്ടെത്തിയ കാര്യങ്ങളും ചില കേന്ദ്രങ്ങള്‍ ഇന്ത്യയുടെ പാരമ്പര്യത്തെ കുറിച്ച് പ്രചരിപ്പിക്കുന്ന കഥകളും തമ്മില്‍ യാതൊരു ബന്ധവുമില്ല.
ഭാരതത്തില്‍ അക്ഷൗഹിണി പടയും പുഷ്പക വിമാനവും പുരാതന ഇന്റര്‍നെറ്റുമെല്ലാമുണ്ടായിരുന്നുവെന്ന് പ്രചരിപ്പിക്കുന്നവരുണ്ട്. എന്നാല്‍ ഇവയൊന്നും സാധൂകരിക്കുന്ന യാതൊരു തെളിവുകളും ഇതുവരെ ലഭിച്ചിട്ടില്ലെന്നും മുഹമ്മദ് പറഞ്ഞു. ചടങ്ങില്‍ ചാവറ കള്‍ച്ചറല്‍ സെന്റര്‍ ഡയരക്ടര്‍ ഫാദര്‍ ജോണ്‍ മണ്ണാറത്തറ സി.എം.ഐ അധ്യക്ഷനായി. ആന്റണി പുലിക്കോട്ടില്‍, ഫാ. പ്രദീപ് പടേട്ട്, എം. രാധാകൃഷ്ണന്‍ നായര്‍ സംബന്ധിച്ചു.