മലപ്പുറം: തെരഞ്ഞെടുപ്പ് ഫലമറിയുന്നതിനു മുന്‍പേ ആഘോഷങ്ങള്‍ക്കൊരുങ്ങി മലപ്പുറം. 12നു വോട്ടെടുപ്പ് കഴിഞ്ഞതു മുതല്‍ കൂട്ടിയും കിഴിച്ചുമുള്ള ചര്‍ച്ചകളും വിജയാഹ്ലാദത്തിനുള്ള ഒരുക്കങ്ങളും തകൃതിയായി നടക്കുന്നുണ്ട്.
യു.ഡി.എഫ് സ്ഥാനാര്‍ഥിയുടെ വിജയമുറപ്പിച്ച പ്രവര്‍ത്തകര്‍ ആഹ്ലാദ പ്രകടനങ്ങള്‍ക്കുള്ള ഗാനങ്ങളടക്കം തയാറാക്കിയിട്ടുണ്ട്. വിവിധയിടങ്ങളിലെ ബേക്കറികളില്‍ പച്ച ലഡുവും ബുക്ക് ചെയ്തിട്ടുണ്ട്. സാമൂഹ്യമാധ്യമങ്ങളിലാണ് തെരഞ്ഞെടുപ്പ് ഫലത്തെ കുറിച്ചുള്ള ചര്‍ച്ചകള്‍ ഏറെ നടക്കുന്നത്.
പി.കെ കുഞ്ഞാലിക്കുട്ടിയുടെ ഭൂരിപക്ഷം പ്രവചിച്ചു യു.ഡി.എഫ് പ്രവര്‍ത്തകരും മണ്ഡലത്തില്‍ യു.ഡി.എഫ് പരാജയപ്പെട്ട ചരിത്രം ഓര്‍മിപ്പിച്ച് എല്‍.ഡി.എഫ് പ്രവര്‍ത്തകരും സജീവമായി രംഗത്തുണ്ട്.