കൊച്ചി: ഓണ്‍ലൈന്‍ ക്ലാസുകള്‍ തുടങ്ങിയതോടെ വീട്ടമ്മമാര്‍ കൂടിയായ അധ്യാപികമാര്‍ക്ക് തിരക്കോട് തിരക്ക്. ഒരുദിവസത്തെ കാര്യങ്ങള്‍ തീര്‍ക്കാന്‍ 24മണിക്കൂര്‍ തികയാത്ത അവസ്ഥ.

കൊവിഡ് കാരണം സ്‌കൂളുകള്‍ തുറക്കേണ്ടതില്ലെന്നും കുട്ടികള്‍ ഓണ്‍ലൈനായി പഠിക്കട്ടെയെന്നും സര്‍ക്കാര്‍ നിശ്ചയിച്ചപ്പോള്‍ അധ്യാപകര്‍ക്കിടയില്‍ ആശയക്കുഴപ്പമുണ്ടായിരുന്നു. പിന്നീട്, ഈ കാലയളവില്‍ അധ്യാപകരും സ്‌കൂളില്‍ എത്തേണ്ടതില്ലെന്ന് വിശദീകരണം വന്നതോടെ പലരും ആശ്വസിക്കുകയും ചെയ്തു. എന്നാല്‍ ഇപ്പോള്‍, 'സ്‌കൂളായിരുന്നു ഭേദം' എന്ന അവസ്ഥയിലാണ് അധ്യാപകരില്‍ പലരും; പ്രത്യേകിച്ച് വീട്ടമ്മമാരായ അധ്യാപികമാര്‍.

 

അതിരാവിലെ മുതല്‍ തിരക്കിലാണ് മിക്ക കുടുംബങ്ങളും. രാവിലെ ഏഴുമണിയോടെ തന്നെ, പല പ്രദേശങ്ങളിലും ഓണ്‍ലൈനായി മദ്‌റസകള്‍ പ്രവര്‍ത്തിച്ചു തുടങ്ങും. അതുകഴിഞ്ഞാലുടന്‍,  സ്‌കൂള്‍ വിദ്യാര്‍ഥികള്‍ക്കുള്ള ഓണ്‍ലൈന്‍ ക്ലാസുകളും.

 

രണ്ടും മൂന്നും മക്കളുള്ള വീടുകളില്‍ ടി.വിയും സ്മാര്‍ട്ട് ഫോണും കംപ്യൂട്ടറുമെല്ലാം ഇടതടവില്ലാതെ പ്രവര്‍ത്തിക്കുകയാണ്. രാവിലെ എട്ടരയോടെ തന്നെ പ്ലസ് ടു കാര്‍ക്കുള്ള ക്ലാസ് തുടങ്ങും. പിന്നാലെ, മറ്റ് ക്ലാസുകളിലുള്ള വിദ്യാര്‍ഥികള്‍ക്കും. 

 

മക്കള്‍ കൃത്യമായി പാഠഭാഗങ്ങള്‍ ഓണ്‍ലൈനായി ശ്രദ്ധിക്കുന്നുണ്ടെന്ന് ഉറപ്പുവരുത്തണം. അതുകഴിഞ്ഞാല്‍, തങ്ങള്‍ പഠിപ്പിക്കുന്ന വിഷയങ്ങളിലെ ക്ലാസുകള്‍ ഇവരും ഓണ്‍ലൈനായി ശ്രദ്ധിക്കണം. ഓണ്‍ലൈന്‍ ക്ലാസുകള്‍ക്ക് ഒടുവില്‍ നിര്‍ദേശിക്കുന്ന പാഠ്യ-പാഠ്യേതര പ്രവര്‍ത്തനങ്ങള്‍ കുറിച്ചെടുത്ത് വാട്‌സ്ആപ് പോലുള്ള നവമാധ്യമങ്ങളിലൂടെ അത് തന്റെ ക്ലാസിലെ കുട്ടികള്‍ക്ക് നല്‍കണം. കൂടാതെ, വൈദ്യുതി മുടക്കം, ഇന്റര്‍നെറ്റ് തകരാര്‍ തുടങ്ങിയ കാരണങ്ങളാല്‍ ഓണ്‍ലൈന്‍ ക്ലാസുകളില്‍ പങ്കെടുക്കാന്‍ കഴിയാത്ത കുട്ടികള്‍ക്കായി അന്നത്തെ പാഠഭാഗത്തിന്റെ സംക്ഷിപ്ത രൂപം തയാറാക്കി അയക്കുകയും വേണം. വിദ്യാര്‍ഥികള്‍ക്ക് നല്‍കുന്ന പാഠ്യ-പാഠ്യേതര പ്രവര്‍ത്തനങ്ങള്‍ വാട്‌സാപ്പിലൂടെയും മറ്റും തിരികെ വാങ്ങി അവ പരിശോധിച്ച് തെറ്റുതിരുത്തി വീണ്ടും അയക്കണം.

അപ്പോഴേക്ക്, ഓണ്‍ലൈന്‍ ക്ലാസുകളില്‍ നിന്ന് പല കാരണങ്ങളാല്‍ വ്യക്തമാകാതെ പോയ പാഠഭാഗങ്ങള്‍ സംബന്ധിച്ചുള്ള സംശയം ചോദിച്ച് വിളികള്‍ ആരംഭിക്കുകയായി. അത് രാത്രി ഏറെ വൈകുംവരെ നീളും. സ്വന്തം വീട്ടിലുള്ള 'ഓണ്‍ലൈന്‍ പഠിതാക്കളുടെ' സംശയങ്ങള്‍ വേറെയും. അതിനിടക്ക്, 'ടീച്ചര്‍ക്ക് ഇപ്പോള്‍ സുഖമല്ലേ, സ്‌കൂളില്‍ പോകാതെ ശമ്പളം കിട്ടുമല്ലോ' എന്ന പരിചയക്കാരുടെയും ബന്ധുക്കളുടെയും അഭിപ്രായ പ്രകടനങ്ങളുമുണ്ടാകും.

 

നേരത്തെ,  40 മിനുട്ട് സമയംകൊണ്ട് ചെയ്ത് തീര്‍ത്തിരുന്ന അധ്യയന ജോലികള്‍ക്ക് ഇപ്പോള്‍ ദിവസം മുഴുവന്‍ മതിയാകാത്ത അവസ്ഥയിലുമായി.

 ഇതൊക്കെയാണെങ്കിലും, ഈ മഹാമാരിക്കാലത്ത് വിദ്യാര്‍ഥികളുമായി ഇടപഴകാന്‍ കഴിയുന്നതും അവര്‍ക്ക് മാര്‍ഗനിര്‍ദേശങ്ങള്‍ നല്‍കാനാകുന്നതും മഹാകാര്യമെന്ന് അധ്യാപികമാരിലൊരാള്‍ 'സുപ്രഭാത'ത്തോട് അഭിപ്രായപ്പെട്ടു.